सौराहाको पाँचतारे रिसोर्ट ‘रोयल टुलिप’ सञ्चालनमा आएको छ। कम्पनीका अध्यक्ष रामेश्वर शाहले रिसोर्ट सञ्चालनमा ल्याएको जानकारी दिएका हुन्।
यो रिसोर्ट केटिएम हस्पिटालिटीले सन् २०२० बाट बनाउन थालेको थियो। देसमा घटेका विभिन्न राजनीतिक र सामाजिक घटनाले गर्दा होटल बनाउन केही ढिलाइ भयो। उक्त रिसोर्ट सञ्चालनमा आएसँगै यसले मुलुककै पर्यटन प्रवर्धनमा सहयोग पुग्ने अपेक्षा राखिएको छ।
‘सौराहामा विश्वकै ठूलो होटल चेनमध्ये परेको ‘लुभ्र होटल्स ग्रुप’को लक्जरी ब्रान्ड ‘रोयल टुलिप’को प्रवेशपछि चितवन पर्यटन बजार उच्चस्तरको लगानी र सेवातर्फ उन्मुख भएको छ,’ उनले भने।
उनका अनुसार होटलको स्वामित्व करिब ७० देशमा १७ सय बढी होटल सञ्चालन गरिरहेको चिनियाँ कम्पनी जिन जियाङ इन्टरनेशनलसँग रहेको छ। त्यसैले, नेपालमा यससँगै अन्तर्राष्ट्रिय नेटवर्कयुक्त उच्चस्तरीय होटल व्यवसाय बिस्तार भएको छ।
यो ब्रान्ड रोयल टुलिपको व्यवस्थापन सम्हाल्न पहिलो पटक नेपाल भित्रिएको हो। लुभ्रले होटल व्यवस्थापन सम्हालेसँगै त्यही अनुसारको सेवासुविधा रिसोर्टमा राखिएको उनले बताए।
‘हाम्रा लक्षित ग्राहक आन्तरिक र बाह्य दुवै पर्यटक हुन्। नेपालीहरूको खर्च गर्ने क्षमता बढेको छ। उनीहरू विदेश समेत घुम्न गइरहेका छन्,’ उनले भने, ’आन्तरिक पर्यटकले अर्थतन्त्र चलायमान बनाउन सहयोग पुर्याउँछन् भने विदेशीले डलर भित्र्याउन मद्दत पुर्याउँछन्।’
विशेषगरी सौराहा पुग्ने पर्यटकका लागि वाइल्ड–लाइफ टुरिजमको अनुभूति दिलाउन यसप्रकारको रिसोर्ट सञ्चालनमा ल्याइएको हो।
‘यो रिसोर्ट सौराहाको आवश्यकता पनि हो। पछिल्लो समय वाइल्ड लाइफको आनन्द लिन चाहने गुणस्तरीय पर्यटकका लागि यस्ता पूर्वाधार सहितका होटल खुल्नुपर्छ,’ उनले भने।
तीन सय विगाह जमीनमा फैलिएको ‘रोयल टुलिप’ चितवन राष्ट्रिय निकुञ्जको छेउमा आधुनिक, दिगो र प्रकृतिमैत्री अवधारणामा निर्माण गरिएको पाँचतारे रिसोर्ट हो।
‘लक्जरी इन नेचर’ भन्ने अवधारणामा केन्द्रित रिसोर्टमा ६५ वटा रूम छन्। सेवा सुविधाका आधारमा रूमलाई सुपेरियर, डिलक्स, प्रिमियम, पुल भिल्ला, वाटर भिल्ला र मचान भिल्ला गरी ६ प्रकारले बाँडिएको छ।
जसमध्ये, तीन वटा वाटर भिल्ला, एउटा मचान, एक्जुकेटिभ स्विट चार वटा, डिलक्स २७ वटा, सुपर डिलक्स ८ वटा र १८ वटा स्यान्डर्ड कोठा छन्। हरेक भिल्लामा फरक सेवासुविधा छन्।
यो रूम फरक क्षमता भएकाको लागि पनि लक्षित गरी बनाएको छ।
यहाँ चारवटा रेस्टुरेन्ट छन्ः अल द डे डाइनिङ, ग्रिल बार र तनावी बार, बनफायर। रिसोर्टको प्रांगणमै हुने बनफायरमा ३० जनासम्म वरिपरि बसेर खाना खान मिल्छ।
ग्राहकले यहाँ न्यूनतम १७ हजारदेखि अधिकतम एक लाख रूपैयाँसम्मको रूम पाउँछन्।
रिसोर्टमा २०० भन्दा बढी प्रजातिका बिरुवाहरू लगाइएका छन्, जसले रिसोर्ट परिसरलाई हरियाली र शान्त वातावरण बनाउन मद्यत पुर्याएको छ। पारिवारिक वातावरण मुख्य विषेशता भएको यस रिसोर्टमा ग्राहकले फिसिङको सुविधा पनि पाउँनेछन्।
त्यस्तै, रिसोर्टमा स्पा, फिटनेस सेन्टर, स्विमिङ पुल, होलिस्टिक वेलनेस र केटाकेटी खेल्नको छुट्टै ठाउँको व्यवस्था छ। रिसोर्टमा एक सय हाराहारीले रोजगारी पाएका छन्।
एक अर्ब ७५ करोड रूपैयाँ लगानीमा बनेको रोयल टुलिप सौराहाकै पहिलो पाँचतारे लक्जरी रिसोर्ट हो। रिसोर्टले आगामी दिनमा क्यासिनो खोल्नेबारे पनि योजना बनाएको छ।
शाह ‘आउटसोर्सिङ’ कम्पनी सञ्चालकका रूपमा चिनिन्छन्। आउटसोर्सिङ एसोसिएसन (नेपाल श्रम आपूर्तिकर्ता संघ) का अध्यक्ष समेत रहेका शाह यसअघि एनआरएन (गैरआवसीय नेपाली संघ) का उपाध्यक्ष र कोषाध्यक्ष थिए।
उनी पर्यटन आकर्षण गर्न निजी क्षेत्रको मात्र नभएर सरकारको ठूलो भूमिका हुने बताउँछन्।
‘निजी क्षेत्रले त लगानी गर्ने हो, तर वातावरण त सरकारले बनाइदिनु पर्यो नि,’ उनले भने।
पर्यटकको बसाईं एकदिन मात्रै बढाउन सकियो भने पनि ३० प्रतिशतले अकुपेन्सी बढ्ने उनको भनाइ छ।
-1763886130.jpeg)
-1746009348.jpg)
