समस्याग्रस्त सहकारी व्यवस्थापन समितिले आफ्नो लागि कुनै पनि रकम नउठाएको स्पष्ट पारेको छ।
एक प्रेस विज्ञप्ति जारी गर्दै समितिले वचत तथा ऋण मिलान कार्यमा शूल्कका रुपमा मिलान रकमको १० प्रतिशत लिएर सोही सहकारीको बैंक खातामा दाखिला गराउने गरिएकोमा उक्त कार्यलाई समितिले पैसा उठायो भन्ने कपोकल्पित प्रचार भन्दै त्यसको खण्डन गरेको हो।
समितिले सो रकम सम्बन्धित सहकारीको खातामा स्वयं बचतकर्ताले नै जम्मा गर्ने गरेको तथा मिलान नभएका बचतकर्ताको वचत रकम फिर्ताका लागि प्रयोग गर्ने गरिएको उल्लेख गरेको छ।
प्रेस विज्ञप्तिमा भनिएको छ, ‘बचत फिर्ता बाहेक सो रकम अन्य कार्यमा खर्च भएको छैन र भविष्यमा पनि गरिने छैन।’
समितिका अनुसार स्थापना कालदेखि आर्थिक वर्ष २०८०/८१ को असारसम्म करिब ६ वर्षको अवधिमा ८३ करोड ६५ लाख रकमको बचत फिर्ता तथा मिलान गरेको छ।
तेस्रो पक्षको जग्गा मिलानमार्फत हालसम्म भने कुनै पनि किसिमको ऋण वा दायित्व फरफारक नगरिएको समितिले जनाएको छ।
समितिले हालसम्म तीन हजार ६ सय ८९ जना मागदाबीकर्ताको सम्पूर्ण बचत रकम फरफारक गरेको छ।
यसै अवधिमा विभिन्न सहकारीका पहिलो चरणमा मागदाबी गरेका ५६ हजार एक सय ६ जना बचतकर्तालाई आंशिक बचत फिर्तामार्फत करिब ३५ करोड ८२ लाख रूपैयाँ फिर्ता दिइएको उल्लेख गरेको छ।
यही अवधिभित्र समितिले तीन अर्ब २९ करोड ८४ हजार सात सय ८० बराबरको बचत रकम मिलान तथा दामासाहीबापत बैंकमार्फत नगद वितरण गरिसकेको जनाएको छ।
सहकारी अनियमितता अनुसन्धानका क्रममा सञ्चालक, व्यवस्थापक र लेखा समितिका सबै सदस्यको चल–अचल सम्पत्ति रोक्का गरिएको समितिले जनाएको छ।
त्यस्तै, समितिले ऋण तिर्न बाँकी रहेका ११ हजार ऋणीका बैंक खाता तथा सम्पत्ति समेत रोक्का गरेको छ। बाँकी ऋणीको खाता तथा सम्पत्ति रोक्का गर्ने प्रक्रिया पनि निरन्तर भइरहेको समितिले बताएको छ।
-1746009348.jpg)
