आइतबार समेत तीन कारोबार दिनमा नेप्से परिसूचक एक सय ४३ अंकले घट्यो। चार वर्षअघिको विन्दु ३००२ सम्म पुगेको नेप्सेले त्यसपछि भने वृद्धिदर कायम राख्न सकेन।
आइतबार बजार २८६० देखि २८८० विन्दु आसपास अडिन्छ कि भन्ने धेरैलाई आस थियो।
'अहिले बजारमा प्राविधिक विश्लेषणको प्रभाव पर्ने गरेको छ,' एक ब्रोकरले भने, 'त्यसैले आइतबार बजार घटे पनि २८६० देखि २८८० विन्दुमा अडिन सक्ने अनुमान थियो, तर बजार थप घट्यो।'
आइतबार बजार एकैदिन ६३ अंकले घटेर २८५८ विन्दुमा आयो। बजारले केही समय घट्न सक्ने देखाए पनि यसलाई वियरिस प्रवृत्ति सुरू भइसकेको भन्न नकिल्ने सेयर विश्लेषक सुवासचन्द्र ढुंगाना बताउँछन्।
'सेयर बजारमा विश्लेषण गरिने मैनबत्ती आकृतिमा लगातार तीन दिन रातो लामो आकारको मैनबत्ती बनेको छ, सेयर कारोबार रकममा पनि उच्चले ह्रास आइरहेको छ,' ढुंगानाले भने, 'यो हेर्दा बजारले केही समय अवरोध सामाना गर्ने देखिएको त छ। तर वियरिस प्रवृत्ति नै सुरू भइसकेको भने छैन।'
नेप्से परिसूचकको सुरू, उच्च, न्यून र बन्द विन्दुको आधारमा मैनबत्ती आकृति बनाइन्छ। तीन दिनमा यस्तो लगातार लामो रातो मैनबत्ती आकृति बनेको छ। यसरी लगातार तीन दिन यस्तो आकृति बन्दा बजार केही दिन थप घट्ने विश्लेषण गरिन्छ।
बजारमा कारोबार रकम पनि घटिरहेको छ। केही दिन अघिसम्म दैनिक २६ अर्ब रूपैयाँको सेयर कारोबार भइरहेकोमा अहिले घटेर १३ अर्ब रूपैयाँमा सीमित भएको छ।
विश्लेषकहरू नेप्सेले अहिले २९३० को विन्दुमा अवरोध पाइरहेको मान्छन्। बजार थप घट्न थालेमा भने २८ सयको विन्दुसम्म झर्न सक्ने अनुमान उनीहरूको छ।
पछिल्लो समय बजारलाई प्रभाव पार्ने गरी आधारभूत पक्षहरूमा खासै परिवर्तन नभएको बजार धेरै तल ओर्लिने सम्भावना नरहेको बजार जानकारहरू बताउँछन्।
'बैंक तथा वित्तिय संस्थाहरूको खराब कर्जामा समान्य भए पनि सुधार हुने मानिएको छ, तर यो सुधारले मात्रै बजार तीन हजार विन्दु कट्न सक्छ कि सक्दैन भन्नेमा लगानीकर्ताहरू आशंकित भएका छन्,' ढुंगानाले भने।
त्यसैले अब बजार बढ्दा भने थोरै भए पनि लाभांश दिनसक्ने कम्पनीहरूमै लगानीकर्ताहरू आकर्षित हुने पनि उनको भनाइ छ।
अहिले लगानी गर्दा यस्ता कम्पनीबाट छोटो अवधिमा केही न केही लाभांश प्राप्त हुने भएकाले पनि यीनमा लगानीकर्ताको आकर्षण हुने मानिएको हो।
अहिले बजार घटाउन सेयर सूचीकरणमा देखिएको विवादलाई पनि मानिएको छ। अहिले सेयर सूचीकरण गर्दा सिडिएस एण्ड क्लियरिङ लिमिटेड (सिडिएससी)ले कम्पनीहरूको संस्थापक र सर्वसाधारण सेयरलाई अलगअलग संकेतिक कोड (आइजिन नम्बर) दिन थालेको छ। यसमा विवाद देखिएको हो।
अहिले बजारमा सूचीकृत भएका बैंक तथा वित्तीय संस्था (बीमा सहित) को संस्थापक र सर्वसाधारण सेयरलाई अलग्गै कोडले जनाइने गरेको छ। यी बाहेकका अन्य कम्पनीमा भने अलग्गै कोड दिने गरिएको थिएन।
तर, पछिल्लो समय अन्य कम्पनीका संस्थापक र सर्वसाधारण सेयरलाई समेत अलग्गै कोड दिन थालेपछि यसले विवाद निम्त्याएको छ। यसको प्रभाव सेयर बजारमा समेत देखिएको ब्रोकरहरू बताउँछन्।
यो पनि :
किन भइरहेछ कम्पनीहरूको सेयर सूचीकरणमा ढिलाइ?
-1746009348.jpg)
