महेश श्रेष्ठ नेतृत्वको गैरआवासीय नेपाली संघ (एनआरएनए) ले साना लगानीकर्ता र ठूला लगानीकर्ताको लागि छुट्टाछुट्टै कम्पनी र फन्ड गठन गर्ने भएको छ।
श्रेष्ठ नेतृत्वको एनआरएनएले साना पुँजीको लागि एनआरएनए रेमिट फन्ड र ठूला तथा मझौला लगानीकर्ताको लागि इन्भेष्टमेन्ट कम्पनी गठन गर्न लागेको हो।
आगामी अक्टोबरबाट यसलाई अगाडि बढाउने तयारी रहेको एनआरएनए अध्यक्ष श्रेष्ठले बताए।
'विदेशमा बसेर श्रम गर्ने धेरैले आफ्नो कमाइ घर खर्चका लागि मात्र प्रयोग गरेका हुन्छन्। त्यस्ता श्रमिकको ५/१०/२० हजार रुपैयाँ मात्र फन्डमा राख्न सकियो भने उनीहरूलाई सहज हुन्छ,' अध्यक्ष श्रेष्ठले भने, 'उनीहरूले मासिक रूपमा ५ हजार मात्रै जम्मा गर्न सके भने पनि यो फन्डमा अर्बौं रकम जम्मा हुन्छ। जसलाई लगानी गरेर प्रतिफल ल्याउन सकिन्छ।'
श्रमिकले पठाएको सानो रकम जम्मा गरेर ठूलो पुँजी बनाउन सकिने भन्दै श्रेष्ठले त्यसले सरकारसँग मिलेर ठूला ठूला आयोजना निर्माण गर्न सकिने बताए।
त्यस्तै, ५ अर्बको इन्भेस्टमेन्ट कम्पनी स्थापना गर्न लागिएको समेत उनले बताए।
'यो कम्पनीमा ठूला तथा मझौला लगानीकर्ताले पैसा जम्मा गर्न सक्छन्। ५ लाखदेखि १ करोडसम्म लगानी गर्न सकिन्छ,' उनले भने, 'कसैले ५/१० लाख लागनी गर्दा केही नहुन सक्छ। तर धेरै मिलेर कम्पनी खडा गर्दा आफू र देशको लागि राम्रो हुन्छ भन्ने हो।'
यस्तो कम्पनीले पनि ठूला आयोजनामा लगानी गर्ने अध्यक्ष श्रेष्ठको भनाइ छ।
त्यस्तै, आफूहरूले परराष्ट्र र श्रम मन्त्रालयसँग समन्वय गरेर कल सेन्टर स्थापना गर्न तयारी गरेको बताए। विदेशमा रहेका नेपालीहरूले दूतावासमा फोन नउठेको गुनासो गर्ने भन्दै उनले एआईको प्रयोग गरेर यस्तो समस्या हटाउन सकिने दाबी गरे।
-1746009348.jpg)
