गैरआवासीय नेपाली संघ (एनआरएनए)ले सिडिएस एण्ड क्लियरिङ लिमिटेडले नेपाल धितोपत्र बोर्ड(सेबोन)लाई पेस गरेको प्रस्तावप्रति गम्भीर ध्यानाकर्षण गराएको छ।
सिडीएससीले धितोपत्र बजारमा सेयरको सार्वजनिक निष्कासन गरी सूचीकृत हुने प्रक्रियामा रहेका कम्पनीहरूको संस्थापक समूहको सेयर अभौतिकीकरण (भौतिक सेयरलाई विद्युतीय प्रणालीमा परिणत गर्ने) प्रक्रियामा संस्थापक र सर्वसाधारण सेयर गरी दुई वटा (इन्टरनेसनल सेक्युरिटिज आइडेन्टिफिकेसन नम्बर–आइएसआइएन) नम्बरको व्यवस्था गर्ने भनेर पेस गरेको प्रस्तावले नेपालको पुँजी बजार, लगानी वातावरण र गैरआवासीय नेपालीको लगानी नेपालमा ल्याउने योजनामा नकारात्मक असर पार्न सक्ने देखिएको एनआरएनएले जनाएको छ।
यस्तो प्रस्ताव कार्यान्वयनमा गएमा विदेशमा बसोबास गर्ने नेपाली संस्थापक लगानीकर्तामा भ्रम र निराशा फैलिने, सेयर कारोबारमा अन्योल बढ्ने, तथा दीर्घकालीन रूपमा पुँजी बजारको स्थायित्व र पारदर्शीतामा गम्भीर असर पर्ने स्पष्ट संकेत देखिएको उल्लेख गरेको छ।
गैरआवासीय नेपाली संघको स्थापनाकालदेखि नै विदेशमा रहेका नेपालीको ज्ञान, सीप र पुँजीलाई नेपालमा भित्र्याउने काम भइरहेकोमा त्यसलाई अझ संगठित रूपमा साना तथा मझौला लगानीलाई समेत नेपालमा भित्र्याउने संघको उद्देश्य रहेको एनआरएनएको भनाइ छ।
सोहीअनुसार ऊर्जा, पूर्वाधार, पर्यटन, स्टार्टअप तथा वित्तीय क्षेत्रमा गैरआवासीय नेपालीहरूले उल्लेखनीय लगानी बढाइरहेको समेत जनाएको छ।
'गैरआवासीय नेपालीहरूबाट नेपालमा हुने लगानी अहिलेको आर्थिक सुधार र पूर्वाधार विकासमा महत्वपूर्ण स्रोत हो। तर विश्वभरीका गैरआवासीय नेपालीहरूलाई नेपालको विकासमा सहभागी हुन तथा आफ्नो ज्ञान, सीप र पुँजी नेपालमा भित्र्याउन सहज वातावरण निर्माण गर्नुपर्नेमा यस प्रस्तावित निर्देशिकाले लगानीमा ठूलो असर पर्ने यस संघको ठहर छ,' एनआरएनएले जारी गरेको विज्ञप्तिमा भनिएको छ।
प्रस्तावित व्यवस्था कार्यान्वयन भएमा संस्थापक सेयरधनीहरूले सेयर बेच्नसमेत कठिनाइ भोग्नुपर्ने, वैदेशिक लगानी फिर्ता गर्न नसकिने परिस्थिति बन्ने र कानुनी अन्योलको वातावरणले अन्तर्राष्ट्रिय लगानीकर्तामा नकारात्मक सन्देश जाने खतरा बढेको गुनासो छ।
लगानी सुरक्षाको प्रत्याभूतिका लागि नियामक निकायहरूले प्रस्ताव पुनर्विचार गर्नुपर्ने एनआरएनएको भनाइ छ।
-1746009348.jpg)
