जुलाई महिनामा हुने गैरआवासीय नेपाली संघ (एनआरएनए) राष्ट्रिय अधिवेशन तथा अक्टोबरमा हुने १२औं अन्तर्राष्ट्रिय महाधिवेशनका लागि सदस्यता वितरण अभियान तीव्र गतिमा अघि बढिरहेको एनआरएनएले जनाएको छ।
हालसम्म ६० हजारभन्दा बढीले सदस्यताका लागि आवेदन दिइसकेको उल्लेख गरिएको छ। अघिल्लो अधिवेशनमाझैं यसपटक पनि ६२ देशमा सदस्यता वितरण अभियान सञ्चालनमा रहेको एनआरएनएले जनाएको छ।
अमेरिका, कतार, मलेसिया, युएईजस्ता देशहरूमा सदस्यता वितरण अभियान हालै मात्र सुरू भएकाले यसपटक पनि करिब पहिलेकै संख्यामा ९७ हजार सदस्यता पुग्ने अनुमान छ।
जापान, अष्ट्रेलिया, क्यानडा, आयरल्यान्ड र न्युजिल्याण्डजस्ता देशहरूमा, जहाँ सदस्यता वितरण प्रक्रिया बन्द भइसकेको छ, पहिलेको तुलनामा धेरैले सदस्यता लिएको उल्लेख छ।
साउदी अरेबिया र बेलायत (युके) मा अघिल्लो सदस्य संख्याको हाराहारीले सदस्यता लिएको संघले जनाएको छ।
यस्तै, करिब २५०० नेपाली बसोबास गर्ने आयरल्यान्डमा ५० प्रतिशतभन्दा बढी नेपालीहरू (१४०० जना) ले एनआरएनएको सदस्यताका लागि आवेदन दिएका छन्।
