पछिल्लो समय विद्यार्थी र अन्य भिसामा अस्ट्रेलिया आउने नेपालीको संख्या ह्वात्तै बढेको छ। हरेक सहरमा नेपालीको उपस्थिति बाक्लिइरहँदा नेपालीको गतिविधि पनि बढ्दो क्रममा छ।
अध्ययन र रोजगारीले व्यस्त नेपालीलाई ठूलो संख्यामा एकैसाथ भेला गराउने 'नेपाल फेष्टिभल' अस्ट्रेलियामा हुने नेपालीहरूको सबभन्दा ठूलो महोत्सव हो।
नेपाली कला संस्कृति रितिरिवाज तथा नेपालको पर्यटकीयस्थलको प्रवर्द्धन गरी अस्ट्रेलियामा बस्ने नेपालीबीच सद्भाव एकता र भाइचार बढाउनु पनि महोत्सवको उद्देश्य हो।
वर्षभरि सहरका विभिन्न स्थानमा हुने कयैन कार्यक्रमभन्दा केही फरक अनि मुलुकपरक यो महोत्सवले कम्तीमा एक दिन भए पनि सबै नेपालीलाई एकैथलो र एउटै पहिचानभित्र बाँध्ने गरेको छ।
वर्षभरि भिन्न झुन्ड र समूहमा विभाजित भई आ-आफ्नो लय पकड्ने नेपाली परम्परालाई नेपाल महोत्सवले एउटै छातामुनि बाँध्ने काम गरेको छ।
महोत्सवमा राखिएका विभिन्न स्टल र नेपाल हाउसको माध्यमबाट नेपाली खाना, नेपाली कला संस्कृति, जात्रा तथा पर्व झाँकी र नेपालको पर्यटनको बारेमा विदेशीलाई जानकारी दिनु महोत्सवको महत्वपूर्ण पाटो हो।
-1741345451.jpg)
महोत्सवमा अस्ट्रेलियाका केन्द्रीय मन्त्री, हरेक राज्यका प्रिमियरलगायत अन्य राजनीतिक दलका नेतासँगै नेपालबाट पनि उच्च पदस्थ सरकारी अधिकारीले कार्यकममा सहभागी हुँदा यसले दुई देशबीचको कूटनीतिक सम्बन्धलाई थप सुमधुर बनाउने सेतुको काम गरेको छ।
यो कार्यक्रम एउटा संस्थाको मात्र भएर अस्ट्रेलियाका हरेक नेपालीको साझा कार्यक्रम हो। यसले कर्मभूमिमा छरिएका हामी सम्पूर्ण नेपालीलाई अपनत्व र जन्मभूमिप्रतिको दायित्वलाई थप उजागर गरेको छ।
सन् २००५ मा एनआरएनए अस्ट्रेलिया गठन भएपछि पहिलोपटक सन् २००६ मा आयोजित कार्यक्रम नै भव्य एवं सभ्य रूपमा सम्पन्न भएपछि उत्साहित अस्ट्रेलियाको नेपाली समुदायले हरेक २ वर्षमा यस महोत्सवलाई पर्वको रूपमा मनाउने एनआरएनए अस्ट्रेलियाको क्यालेन्डर नै बनिसकेको छ। अस्ट्रेलियामा नेपालीको आगमन र उपस्थिति बढ्दै जाँदा महोत्सवलाई पनि हरेक राज्यमा विस्तार गरिएको छ।
एनआरएन अस्ट्रेलियाका राज्य समितिहरूको आयोजनामा भए पनि स्थानीय नेपाली समुदायमा आधारित संघसंस्थाहरूले नेपाल फेष्टिभलमा सहकार्य गर्दैछन्। यसैगरी दूतावास, अस्ट्रेलियाका राज्य सरकारहरूले पनि नेपाल फेष्टिभलमा हातेमालो गरेका छन्।
डार्बिनबाट सुरू भएको यो वर्षको नेपाल महोत्सव पर्थसँगै सिड्नीमा सम्पन्न भइसकेका छन्। अब बाँकी ५ राज्यमा एकै महिना भित्र सम्पन्न हुँदैछन्।
मार्च ९ तारिख एडिलेडबाट सुरू हुने नेपाल फेष्टिभलको क्रम अप्रिल ६ तारिख ब्रिसबेन पुगेर टुंगिनेछ।
एडिलेडको एल्डर पार्क आगामी आइतबार बिहान साढे १० बजेदेखि राति साढे १० बजेसम्म १२ घण्टा नेपालमय बन्नेछ। यस्तै मेलवर्नको मुटु फेडरेसन स्क्वायर, क्यानबेराको स्टेज ८८ कमनवेल्थ पार्क, होबार्टको पार्लियामेन्ट हाउस लन, सालामाङ्का र ब्रिसबेनको मुटु किङ जर्ज स्क्वायरमा नेपाल फेष्टिभल दिनभर चल्नेछ।
कहाँको तयारी कस्तो छ?
मार्च ९ - एल्डर पार्क एडिलेड
आगामी आइतबार एडिलिटको मुटु एल्डर पार्कमा हुने नेपाल फेस्टिभलको सम्पूर्ण तयारी पूरा भएको एनआरएनए अस्ट्रेलियाका उपाध्यक्ष एवं एडिलेट संयोजक सञ्जय पुरीले जानकारी दिए।
यसपालिको महोत्सवमा नेपाल हाउस, परेड, विभिन्न खानाका स्टल र गीत संगीत नै प्रमुख आकर्षण रहेको पुरीले बताए।
महोत्सवमा राखिएका विभिन्न स्टल र नेपाल हाउसको माध्यमबाट नेपाली खाना, नेपाली कला र संस्कृति तथा नेपालको पर्यटनको बारेमा विदेशीलाई जानकारी दिनु यस महोत्सवको महत्वपूर्ण पाटो रहेको उनले बताए।
'यसपालि हामीले नेपाल हाउसलाई विशेष बनाएका छौं। नेपालकै झल्को दिने गरी धरहरा, सुन्धारा, पशुपतिनाथ, पेगोडा शैलीको विशेष रथ, एक सिंगे गैडा र केटा नेपाल हाउसमा समेटेको छौं,' उनले भने, 'हामीले पेगोडा शैलीको विशेष रथ नेपालबाटै मगाएका छौं। जसको माध्यमबाट आफू नेपालमै रहेको अनुभूति हुनेछ।'
कार्यक्रमस्थलमा नेपाली टिपिकल खाना र जात्रा तथा विभिन्न जात जातिका कला, संस्कृति र वेशभूषा झल्कने झाँकी प्रदर्शन हुनेछन्।
कार्यक्रम सुरू हुनु अगाडि विशेष परेड र झाँकीमार्फत् धेरैभन्दा धेरै जात जातिको मौलिक पोशाकमा बाजा गाजासहित शान्ति पद यात्रा गरिने छ। यस्तै राष्ट्रियस्तरको कन्दरा ब्याण्ड, कलाकार शिव परियार र समीक्षा अधिकारीसहित स्थानीय कलाकारको विशेष प्रस्तुति रहनेछ।
महोत्सवको माध्यमबाट दुई देशबीचको कूटनीतिक सम्बन्धलाई थप सुमधुर बनाउन अस्ट्रेलियाका मन्त्री, प्रिमियरलगायत अन्य राजनीतिक दलका नेताहरूसँगै नेपाली उच्च पदस्थ सरकारी अधिकारीले कार्यकममा सहभागिताका जनाउँछन्।
महोत्सवमा यसपालि अस्ट्रेलियाका लागि नेपाली रादजूत चित्रलेखा यादव, मल्टिकल्चरल मन्त्री जोइ पेडिसन, विपक्षी दलका नेतासहित अन्य नेताहरूको उपस्थिति हुनेछन्।
यस्तै फायरवक्ससँगै नेपाल फेस्टिभलमा समापन हुने उनले जानकारी दिए।
कार्यक्रम तयारीका लागि गेष्ट आर्टिस्ट म्यानेजमेन्टदेखि भेन्यू म्यानेजमेन्टसम्म १२ वटा विभिन्न उपसमिति गठन गरिएको संयोजक पुरीले जानकारी दिए।
-1741345451.jpg)
मार्च १५ - फेडरेसन स्क्वायर मेलवर्न
मेलवर्नको प्रमुख पर्यटकीय स्थल फेडेरेसन स्क्वायर आगामी मार्च १५ मा नेपालमय हुने भएको छ। नेपाल फेस्टिबल मेलवर्नको सबै तयारी पूरा भएको एनआरएनए अस्ट्रेलियाका उपाध्यक्ष एवं भिक्टोरिया राज्यका संयोजक मणिरत्न सापकोटाले जानकारी दिए।
सापकोटाका अनुसार यस पटकको नेपाल फेष्टिभलमा जानकी मन्दिरको प्रारूप प्रदर्शन गरिने भएको छ। यस्तै मिथिला आर्ट, धान रोपाइँ गर्ने व्यवस्था र विवाह मण्डप निर्माण गरेर दर्शकहरूलाई बेहुला वा बेहुलीको स्वरूपमा फोटो खिच्न पाउने व्यवस्थासमेत मिलाइने भएको छ।
यस्तै महोत्सवमा ८ वटा खानाका स्टल रहने र एउटा नेपाली बियरसहितको पेय पदार्थको छुट्टै स्टल रहने उनले जानकारी दिए। यस्तै, सहयोगी संस्थासहित अन्य ३० वटा जति व्यवसायी स्टल रहने उनले बताए।
नेपाल फेस्टिबल मेलवर्नमा पहिलो पटक प्रमुख अतिथिको रूपमा भिक्टोरिया राज्यकी प्रिमियर जसिन्टा एलान सहभागी हुने भएकी छन्। यस्तै अस्ट्रेलियाका लागि नेपाली राजदूत चित्रलेखा यादव, संघीय सांसदहरू, विपक्षी दलका नेताहरू तथा सांसदहरू सहभागी हुने पक्का भएको सापकोटाले जानकारी दिए।
'नेपाल फेष्टिभल मेलवर्नमा पहिलो पटक राज्यको प्रिमियर नै सहभागी हुँदै गर्दा सबै जना उत्साही भएका छन्,' उनले भने, 'नेपाल फेष्टिभल मेलवर्नमा आउने दर्शकहरूलाई सहज होस् भन्ने अभिप्रायले जिलोंग, बालाराट, बेन्डिगो लगायतका ठाउँबाट आउनका लागि बसको व्यवस्था समेत गरिएको छ।'
मार्च २२- स्टेज ८८ कमनवेल्थ पार्क, क्यानबेरा
नेपाली कला संस्कृति, खानपान, वेशभूषा र मौलिकताको प्रवर्द्धन गर्ने उद्देश्य राखेर आगामी मार्च २२ मा दोस्रो पटक क्यानबेरामा नेपाल फेस्टिभल आयोजना गरिँदैछ। क्यानबेरामा सिंगो नेपालको झल्को दिने गरी महोत्सवको तयारी तीव्र पारिएको संयोजक चुडामणि सापकोटाले जानकारी दिए।
झाँकी सहितको र्याली र परेडबाट कोमनवेल्थ पार्कमा सुरू हुने महोत्सवमा अस्ट्रेलियामा रहेका विभिन्न नेपाली संघसंस्था, स्थानीय अस्ट्रेलियन नागरिकको समेत बाक्लो सहभागिता हुने सापकोटाले जानकारी दिए।
महोत्सवमा विभिन्न सांस्कृतिक कार्यक्रमसँगै नेपालको कला तथा संस्कृति झल्काउने डिस्प्ले, नेपाली परिकारको फुडस्टल, बालबालिकालाई रमाउने थलो राखिनेछ।
महोत्सवमा स्थानीय कलाकारका साथै नेपालबाट आएको कन्दरा व्याण्ड, शिव परियार र समीक्षा अधिकारीले विशेष प्रस्तुति दिनेछन्।
मार्च २९ - पार्लियामेन्ट हाउस लन सालामाङ्का, होबार्ट
आगामी मार्च २९ तारिखका दिन तास्मानियामा ‘नेपाल फेस्टिबल’ हुँदैछ। तास्मानियाको ऐतिहासिक स्थल पार्लियामेन्ट लन सालामान्कामा हुने फेस्टिभलको तयारी अन्तिम चरणमा पुगेको संयोजक जगदिश खड्काले जानकारी दिए।
‘नेपाल फेस्टिभल’ नेपाली कला, संस्कृति, संगीत, परम्परा र पहिचानलाई प्रवर्द्धन गर्ने सबभन्दा ठूलो कार्यक्रम बनेको संयोजक खड्काले बताए। उनले यसले नेपाली भाषा बोल्ने सबैलाई एक ठाउँमा ल्याउने विशेष अवसर प्रदान गर्ने दाबी गरे।
कार्यक्रममा कन्दरा ब्यान्डको मुख्य प्रस्तुति हुनेछ। यस्तै, चर्चित गायिका समीक्षा अधिकारी, शिव परियारसँगै उदय श्रेष्ठ र युवराज चौलागाईंले पनि उपस्थित दर्शकलाई नेपालको झल्को दिनेछन्।
-1741345451.jpg)
फेस्टिभलमा तास्मानियाका प्रिमियर, अस्ट्रेलियाका लागि नेपाली राजदूत, तास्मानियाका विपक्षी नेताहरू, राज्य मन्त्रीहरू, सिटी काउन्सिलका मेयरहरू, अन्य राज्यका एनआरएन नेताहरू तथा विशिष्ट अतिथिहरू नेपाल फेस्टिभलमा सहभागी हुनेछन्।
‘नेपाल फेस्टिभल’ ले नेपाली समुदायलाई एकताको सूत्रमा बाँध्ने, नयाँ पुस्तालाई नेपाली कला र संस्कृतिप्रति अभिरूचि जगाउने, र नेपाली पहिचानलाई अन्तर्राष्ट्रिय जगतमा उजागर गर्ने महत्त्वपूर्ण अवसर प्रदान गर्ने अपेक्षा छ', उनले भने।
अप्रिल ६- किङ जर्ज स्क्वायर, ब्रिसबेन
ब्रिसवेनको मुटु ब्रिजवेन सिटिमा नेपाली कला संस्कृति, भाषा, वेशभूषा, नेपाली खानाको संरक्षण प्रवर्द्धनसँगै नेपाली पहिचान झल्काउने हेतुले आगामी अप्रिल ६ तारिखमा नेपाल फेस्टिभल हुँदैछ।
फेस्टिभलको तयारी तीव्र पारिएको एनआरएनए क्विन्सल्याण्ड राज्यका संयोजक शम्भु गैसेले जानकारी दिए।
महोत्सवमा नेपाल हाउस, परेड, विभिन्न खानाका स्टल र गीत संगीत नै प्रमुख आकर्षण रहने संयोजक गैसेले बताए।
बिहान १० बजेदेखि सुरू हुने महोत्सव रातिको १० बजेसम्म चल्नेछ।
कार्यक्रमस्थलमा नेपाली टिपिकल खाना र जात्रा तथा विभिन्न जात जातिका कला, संस्कृति र वेशभूषा झल्कने झाँकी प्रदर्शन हुनेछन्।
कार्यक्रम सुरू हुनुअगाडि विशेष परेड र झाँकीमार्फत धेरैभन्दा धेरै जातजातिको मौलिक पोशाकमा बाजा गाजासहित शान्ति पद यात्रा गरिने छ। यस्तै राष्ट्रियस्तरको कन्दरा ब्याण्ड, कलाकार शिव परियार र समिक्षा अधिकारीसहित स्थानीय कलाकारको विशेष प्रस्तुति रहनेछ।
-1741345452.jpg)
-1741345450.jpg)
-1741345450.jpg)
-1741345451.jpg)
-1741345452.jpg)
