यसपालि पनि विगत वर्षमा झैं दर्जनौं तीज गीत सार्वजनिक भए। केहीले राम्रो चर्चा पाए, केही यत्तिकै सेलाए। यीमध्ये एउटा तीज गीत 'तीजका गीत कस्ता हुन्थे सुन' ले भने विस्तारै स्रोता/दर्शकको माया पाउँदै युट्युबमा राम्रो भ्युज बटुल्यो।
श्रीकृष्ण बम मल्ल र लक्ष्मी मल्लको प्रस्तुतिमा तीन साताअघि सार्वजनिक यो गीतले सुरूआती दिनमा खास्सै राम्रो भ्युज पाएको थिएन्। तर, तीजसम्म आउँदा यो युट्युबमा सर्वाधिक भ्युज पाउने यस वर्षका तीज गीतको सूचीमा दोस्रो नम्बरमा आइपुग्यो।
श्रीकृष्ण बम मल्लको शब्द, लक्ष्मी मल्लको स्वर रहेको गीतले मंगलबार दिउँसोसम्म युट्युबमा ७४ लाखभन्दा बढी भ्युज पाएको छ। टिकटकमा पनि गीत चर्चामा छ।
पारी पारी आएका ढाका टोपी लाएका
तिनै होलान् हाम्रा बाबा लिन आएका
यो गीतले युट्युब भ्युजमा अहिले चर्चामा रहेको अर्को गीत 'नत्र भने जिन्दगी व्यर्थ छ' लाई समेत पछि पारेको छ।
'तीजका गीत कस्ता हुन्थे सुन' स्रोता/दर्शकको नजरमा पर्नुपछाडि केही कारणहरू हुनसक्छन्।
अहिलेका तीज गीतहरूमा आधुनिकता र भड्किलोपन हाबी भइरहेको गुनासो बढिरहेको समयमा यो गीतमा मौलिकता र परम्परागत स्वाद पाइन्छ। गीतको शब्दहरूले तीजको मर्मलाई समेटेको युट्युबमा स्रोता तथा दर्शकहरूको प्रतिक्रिया देख्न सकिन्छ।
गीतमा चेलीको वेदना, माइतीको सम्झना र परम्परागत संस्कृतिको वर्णन गरिएको छ। यसले घुमाउरो पारामा अहिलेका तीज गीतहरूमा बढ्दै गएको विकृतिलाई पनि ब्यग्य गरेको छ। श्रीकृष्ण बम मल्लकै संगीत संकलन रहेको गीतको भिडिओ ग्रामीण परिवेशमा छ।
शंकर बिसीले भिडिओको निर्देशन गरेका छन्। भिडिओमा वरिष्ठ कलाकार मिथिला शर्माको उपस्थितिले पनि गीतको गरिमा अझ बढाएको छ। साथमा करिश्मा ढकाल, मेलिना शाह, एरोना मल्ल लगायतको नृत्यले पनि गीतलाई आकर्षक बनाएको छ।
दुर्गा पौडेल र टिमको छायांकन रहेको भिडिओमा मिलन विश्वकर्माको सम्पादन छ।
-1756118929.jpeg)
-1746009348.jpg)
