यो वर्ष पनि अरू सालझैं तीज विशेष दर्जनौं गीत सार्वजनिक भए। तर चर्चा एकाधले मात्रै पाए। अझ यसपालि अघिल्लो वर्षजति पनि तीज गीत चलेनन्।
गत वर्ष विष्णु माझीको तीज गीतले ९ दिनमै युट्युबमा करोड भ्युज पाएको थियो। यसपालि तीज आउन ४ दिन बाँकी रहँदा कुनै पनि गीत करोड क्लब नजिक समेत पुगेका छैनन्।
यस वर्ष कतिपय स्थापित कलाकारहरूका गीतले चर्चा समेत पाएनन्।
यसपालि पनि विष्णु माझी हाबी, यी हुन् युट्युबमा धेरै हेरिएका गीत
गत वर्ष जस्तो चर्चा नभए पनि यसपालि तीज गीतमा विष्णु माझी नै हाबी देखिइन्। उनको गीतको छायांकन, रिलिजदेखि रिलिज पछिसम्म चर्चा भयो।
यसपालि विष्णुले 'पुतलीको भट्टी' को भाग २१ को रूपमा 'म त नराउरी' सार्वजनिक गरेकी हुन्। गीतले अपेक्षित चर्चा नपाए पनि युट्युबमा शुक्रबार दिउँसोसम्म (९ दिन) मा ५९ लाख पटक हेरिएको छ।
फिल्म 'कोशेढुंगा' मा समावेश 'नत्र भने जिन्दगी व्यर्थ छ' यो वर्षको अर्को चर्चित तीज गीत हो। खेम सेन्चुरी, समीक्षा अधिकारी र दीपिका बयम्बु मगरको स्वर रहेको गीतले एक महिनामा ५२ लाखभन्दा बढी भ्युज पाएको छ। टिकटकमा पनि गीत चर्चामा छ।
युट्युब भ्युजका आधारमा भने यो समाचार तयार पार्दासम्म एलिना चौहानको स्वरमा रहेको 'छोरीको शिर आमा' सबभन्दा अगाडि छ। पाँच साताअघि सार्वजनिक यो गीतको भ्युज ६० लाख नजिक पुगेको छ।
यस वर्ष अर्को तीज गीत 'तीजका गीत कस्ता हुन्थे सुन' लाई पनि रूचाइएको छ। लक्ष्मी मल्लको स्वरमा रहेको गीतलाई युट्युबमा ४३ लाखभन्दा बढी पटक हेरिएको छ।
'अभागी छोरी' शीर्षकको गीतले पनि युट्युबमा राम्रो भ्युज पाएको छ।
शान्तिश्री परियार र दिपेन थापाको स्वरमा रहेको गीतले युट्युबमा ३७ लाखभन्दा बढी भ्युज पाएको छ।
एलिना चौहान, समीक्षा अधिकारी र मेलिना मैनालीको स्वर रहेको 'पृश्वी छोडेर' गीतले पनि युट्युबमा राम्रो भ्युज पाएको छ।
स्थापित कलाकारहरूका अफिसियल गीत पनि चलेनन्
यसपालि प्रकाश सपुतको गीत रिलिज अघिदेखि चर्चा भएको थियो। तर उनको गीत 'नाइँ भनेसी नाइँ' ले रिलिजपछि भने अपेक्षित चर्चा पाउन सकेन। विगतका वर्षमा उनले तीजको अवसरमा ल्याउने अधिकांश गीतले चर्चा पाएका थिए।
त्यस्तै, पशुपति शर्माले यसपालि आफ्नो युट्युबमा 'लाइटै बालेर हेर मयाले' र 'खै तिम्ले बुझेको' गरी २ वटा तीजविशेष गीत सार्वजनिक गरे। दुवै गीतलाई लिएर धेरै चर्चा भएन।
अर्की गायिका शान्तिश्री परियारले यसपालि तीजको अवसर पारेर आफ्नै युट्युबमा 'साथी खुरापाती' ल्याइन्। तर यो गीत युट्युब भ्युज र चर्चामा निकै पछि पर्यो।
कोमल वली, ज्योति मगर, मञ्जु पौडेल, बद्री पंगेनी, खुमन अधिकारी, सुनिता दुलाल, भागिरथ चलाउने लगायतले आफ्नै अफिसियल युट्युबमा ल्याएका तीज विशेष गीतले पनि अपेक्षित चर्चा पाउन सकेनन्।
-1746009348.jpg)
