नयाँ तीज गीत 'म त नराउरी' सार्वजनिकसँगै गायिका विष्णु माझी थप चर्चामा छिन्।
बुधबार बिहान सार्वजनिक गीतले शुक्रबार दिउँसोसम्म युट्युबमा २५ लाख हाराहारी भ्युज पाइसकेको छ। यो गीत 'पुतलीको भट्टी' भाग २१ का रूपमा बजारमा आएको हो।
नेपाली लोक संगीत क्षेत्रमा एउटै शीर्षकको गीतलाई दुई दशकभन्दा लामो समयसम्म निरन्तरता दिनु आफैमा एक दुर्लभ कीर्तिमान हो। गायिका विष्णु माझीले तीज गीतमार्फत यो कीर्तिमान बनाएकी छन्।
'पुतलीको भट्टी' नाममा २१ औं भाग सार्वजनिक गरेर उनले शृङ्खलाबद्ध गीतको आफ्नै रेकर्डलाई थप उचाइ दिएकी छिन्।
गत वर्ष 'पुतलीको भट्टी-२०' का रूपमा 'आइनँ आमा यो तीजमा' सार्वजनिक भएको थियो, जसलाई युट्युबमा २ करोड ४५ लाखभन्दा बढीले हेरेका छन्।
जानकारहरूका अनुसार वि.सं २०६१ सालमा 'पुतलीको भट्टी' को पहिलो भाग सार्वजनिक भएको थियो। त्यसयता विष्णु माझीको स्वरमा हरेक वर्ष यो शृङ्खलाको नयाँ भाग आउने गरेको छ।
नेपाली लोक सांगीतिक क्षेत्रमा अन्य कुनै पनि गायक/गायिकाले एउटै नाममा रहेर यति धेरै भागसम्म लगातार गीत दिन सकेका छैनन्। सम्भवतः नेपाली संगीत क्षेत्रमै एउटै गीतको यतिधेरै भाग सार्वजनिक छैन।
हरेक वर्ष 'पुतलीको भट्टी' को नयाँ भाग आउनुलाई विष्णुका प्रशंसकहरूले तीज पर्वको आगमनको संकेतको रूपमा समेत लिने गर्छन्।
सार्वजनिक जीवनबाट पूर्ण रूपमा अलग रहे पनि उनी आफ्नो स्वरको माध्यमबाट निकै चर्चामा छिन्।
'पुतलीको भट्टी' शृङ्खलाका अधिकांश गीतमा विष्णुका श्रीमान् सुन्दरमणि अधिकारीको शब्द तथा संगीत रहने गरेको छ। आफ्नै लगानीमा रहेको सपना म्युजिक इन्डष्ट्रिजको युट्युबबाट 'पुतलीको भट्टी' सार्वजनिक हुँदै आएको छ।
-1755241369.jpg)
-1746009348.jpg)
