लोक तथा दोहोरी गायक पशुपति शर्माले आफूले ल्याउने प्रायः गीत आफै सिर्जना गर्छन्। अरूका थुप्रै गीत गाए पनि पशुपति आफैले सिर्जना गरेका गीतबाट परिचित बनेका हुन्।
उनी अरूले भन्दा केही अलग सिर्जना ल्याउने र आफ्नै सिर्जनामा गाउने गरेका कारण चर्चामा आएका थिए। सेतोपाटीसँगको कुराकानीमा उनले गायन यात्राको सुरूवाती दिनमा भोगेको एक अनुभव सेयर गरे।
पशुपतिले भनेअनुसार, जब उनी आफ्नो पहिलो गीत रेकर्ड गरेर एउटा म्युजिक कम्पनीमा पुगे, त्यहाँका सञ्चालकले उनको स्वरमाथि प्रश्न उठाए।
'गीत त ठीकै छ कान्छा, तर तेरो स्वर हटाएर कि कुलेन्द्र बिकको कि पुरूषोत्तम न्यौपानेको स्वर हाल्नुपर्यो,' कम्पनीका व्यक्तिले भनेको कुरा उद्धृत गर्दै पशुपतिले सुनाए। तर उनी आफ्नै स्वरमा गीत रेकर्ड गराउन चाहन्थे।
आफ्नै सिर्जनामा अरूको स्वर हाल्नुपर्ने प्रस्ताव सुने पनि उनी पछि हटेनन्।
'आफ्नै लेखेको गीत त अर्कालाई गाउन लाउनुपर्यो भनेपछि, अब मैले कसैले दिएको गीत गाउने चाँजो पनि छैन,' पशुपतिले हाँस्दै भने, 'तर म पछि हटिनँ। गीत त आफै गाउने हो भन्नेमा रहेँ। थप मेहनत गर्न थालेँ।'
त्यो समयपछि आफ्नै सिर्जनालाई आफ्नै स्वरमा स्थापित गर्ने अठोट लिएर मेहनत गरेको उनले बताए। उनले मायाप्रेम, समसामयिक, राजनीतिक विषयमा रहेर गीत सिर्जना गरे भने त्यसलाई रमाइलो र व्यगात्मक शैलीमा प्रस्तुत गर्दै गए।
उसो त पशुपति लाइभ दोहोरी गाउनमा पहिल्यैदेखि खप्पिस थिए। प्रतियोगीतामा भाग लिएर थुप्रै पुरस्कार जितेका थिए।
'त्यसबेला सहकर्मीले गायनमा चल्न एल्बम ल्याउनुपर्छ, प्रतियोगीतामा मात्र भाग लिएर हुँदैन। तँ चल्दैनस् भन्नुहुन्थ्यो', पशुपतिले सुरूवाती दिन सम्झँदै भने, 'सुरूमा एउटा गीत गाउन १२ दिन लाग्यो। गाउन नसकेर स्टुडिओ पुगेर धेरैपटक फर्केर आएँ। त्यसबेला म गाउन सकिनँ, बर्बाद भयो, म त गायक हुँदिन् भनेर बसेको भए हुँदैनथेँ होला। तर म हरेस खाइनँ। कोसिस गरेँ। मेहनत गरेँ।'
त्यही मेहनत र दृढताका कारण आज पशुपति शर्मा 'मलाई अमेरिका यही' हुँदै 'लुट्न सके लुट' देखि हालसालै चर्चामा रहेको 'झोले' जस्ता दर्जनौं चर्चित गीतका सर्जक तथा गायकका रूपमा स्थापित भएका छन्।
यतिबेला उनी तीज विशेष कार्यक्रमका लागि दिल्ली पुगेका छन्। त्यहाँबाट दुबई, जापान लगायतका देशमा पुग्नेछन्।
हेर्नुहोस् सेतोपाटी कन्भरसेसनमा पशुपति शर्मा र रिता थापाले गरेको कुराकानीः
-1755241369.jpg)
-1746009348.jpg)
