कलाकार दुर्गेश थापाले भ्लगर सिसन बानियाँ र सामाजिक सञ्जालमा चर्चामा रहेकी गुँरास नानीसँगको सहकार्यमा ल्याएको गीतले युट्युबमा कीर्तिमान रचेको छ।
बुधबार बेलुका सार्वजनिक 'जाने भए जाम माया' गीतले रिलिजको २४ घण्टाभित्र धेरै भ्युज पाउने नेपाली गीतको रेकर्ड बनाएको हो।
रिलिजको दुई घण्टामै ट्रेन्डिङमा उक्लिएको गीतलाई २० घण्टामै १६ लाख ३६ हजारभन्दा बढीपटक हेरिएको छ। अहिलेसम्म २४ घण्टाभित्र यति धेरै पटक कुनै नेपाली गीत हेरिएको थिएन।
यसअघि २४ घण्टामा धेरै भ्युज पाउने नेपाली गीतमा विष्णु माझीको 'आइनँ आमा यो तीजमा' थियो। यसलाई रिलिजको एक दिनमा १५ लाखपटक हेरिएको थियो।
दुर्गेशको गीतले रिलिजको २० घण्टामै विष्णु माझीको गीतको उक्त रकर्ड तोडेको हो। २४ घण्टाभित्र गीतको भ्युज २० लाख हाराहारी पुग्ने अनुमान गर्न सकिन्छ।
'जाने भए जाम माया' को कुरा गर्दा डान्सिङ ट्याक यो गीत रमाइलो शैलीको छ।
दुर्गेश, सिसन र गुँरास नानीबीचको यो सहकार्यलाई लिएर केही दिनदेखि सामाजिक सञ्जालमा चर्चा भइरहेको थियो। भिडिओ छायांकनका तस्बिरहरू समेत भाइरल भएका थिए। सोही चर्चाले पनि युट्युब भ्युजलाई फाइदा पुर्याएको छ।
यो समाचार तयार पार्दासम्म गीतलाई लिएर युट्युबमा १६ हजार बढी प्रतिक्रियाहरु आएका छन् भने १ लाख ८६ हजारपटक लाइक गरिएको छ।
यो गीतको शब्द, संगीत र संगीत संयोजन दुर्गेश स्वयंको हो। स्वरमा पनि दुर्गेश र सिसनले सहकार्य गरेका छन्। साथमा अल्हाजी गेरोले समेत यसमा स्वर दिएका छन्। भिडिओमा दुर्गेश, सिसन र गुँरास नानीसँगै अन्य केही कलाकारहरू पनि देखिएका छन्। शिव बि.कको कोरियोग्राफी तथा निर्देशनमा यसको भिडिओ बनेको हो।
-1746009348.jpg)
