गुड फ्राइडे सिनेमा
यो कथाको सुरूआत चर्चित न्युरोलोजिस्ट डा. प्रमोदको मृत्युबाट हुन्छ। उनलाई माला अर्पण गर्न आएका उनका जिम प्रशिक्षक धिना शंकास्पद देखिन्छन्।
यसपछि प्रहरी कुमारनले धिनाले आफ्नी श्रीमतीको हत्या गरेको देख्छन्। धरपकडमा धिना मारिन्छन्। यो घटनाले कुमारनलाई गहिरो मानसिक असर पर्छ।
उनी मानसिक चिकित्सक डा. आधिरैसँग परामर्श लिन्छन्।
केही समयपछि धिनाकी श्रीमतीको जस्तै शैलीमा अर्को हत्या हुन्छ। एक चर्चित अभिनेत्री मारिन्छिन्।
कुमारन घटनास्थलमा पुग्छन् र अघिल्लो हत्यामा जस्तै रगतका दागहरू र उही ब्रान्डको चुरोटको ठुटो देख्छन्। कुमारनलाई फेरि पनि गाह्रो हुन्छ। आधिरैले उनलाई भेट्छिन् र उनको मानसिक समस्याको उपचार थाल्छिन्।
त्यसपछि कुमारनले एक मोटिभेसनल स्पिकर रूद्रनलाई भेट्छन्।
बिस्तारै ठीक हुँदै गएपछि कुमारन फेरि अनुसन्धानमा लाग्छन्। अभिनेत्रीको हत्या गोपी नामका मेकअप आर्टिस्टले गरेको थाहा पाउँछन्। कुमारनलाई यो पनि थाहा हुन्छ, गोपी र धिनाको व्यवहार हत्या गर्नुभन्दा केही दिनअघि नै फरक देखिएको थियो।
कुमारन गोपीको पछाडि लाग्छन्। तर केही जानकारी नपाउँदै गोपीको पनि मृत्यु हुन्छ।
त्यसपछि वैज्ञानिक नारायणनको हत्या हुन्छ। कुमारन नारायणनको घरमा प्रमाण खोज्न जान्छन् र त्यहाँ रूद्रनले लेखेको किताब फेला पार्छन्।
रूद्रनलाई नारायणनका बारेमा थाहा हुन सक्ने ठानेर कुमारन उनीसँग भेट गर्न पुग्छन्। त्यहाँ पुग्दा रूद्रनको व्यवहार बदलिएको देखिन्छ।
उनले त्यही ब्रान्डको चुरोट खान थालेका हुन्छन् जुन अघिल्ला हत्याहरूका प्रमाण हुन्छन्। कुमारनलाई अनौठो लाग्छ।
जब रूद्रनले एक्कासि आफ्नो कुकुरलाई मार्छन्, कुमारनले उनलाई नियन्त्रणमा लिन्छन्। प्रहरी कार्यालयमा हस्ताक्षर गर्ने क्रममा रूद्रनले प्रमोद नाम लेखेर, पछि मेटाएर रूद्रन लेखेको कुमारनले देख्छन्।
अनुसन्धान क्रममा थाहा हुन्छ, यी सबै हत्या पछाडि कुनै प्रविधिजन्य रहस्य छ। जति अनुसन्धान अघि बढ्छ, कथा अझ गहिरो, जटिल र चाखलाग्दो बन्छ। कुमारनले जब यो प्रविधिको वास्तविकता पत्ता लगाउँछन्, उनी आफै असाध्यै ठूलो खतरामा पर्छन्।
के कुमारनले यो रहस्य पत्ता लगाउलान्? वा अर्को सोचको सिकार बन्छन्?
यसका लागि दक्षिण भारतीय (तमिल) फिल्म 'मायावन' हेर्नुहोला।
सिभी कुमार निर्देशनमा बनेको यो फिल्म सुरूमा अलि सुस्त लाग्न सक्छ। तर कथा बिस्तारै रोचक बन्छ र दोस्रो भागमा धेरै रोचक हुन्छ। अन्त्यतिर कथा यस्तो ठाउँमा पुग्छ, जहाँ सबै कुरा खुलेको जस्तो लाग्छ, तर अझै रहस्य बाँकी हुन्छ। 'मायावन' को असली जादु यही हो।
-1746009348.jpg)
