गायिका एलिना चौहान यतिबेला मेला महोत्सवहरूमा व्यस्त छिन्। हालै उनले गोरखा, चितवन, बुटवल र धुलिखेललगायतका स्थानमा पुगेर आफ्नो सांगीतिक प्रस्तुति दिइन्। यसै क्रममा उनले चाँडै सार्वजनिक हुन लागेको आफ्नो नयाँ गीत 'बाँचेकै छु क्यारे' को प्रवद्र्धन पनि गरेकी छन्। चितवनमा गत साता आयोजित सांगीतिक साँझमा उनले नयाँ गीत गाउँदै गर्दाका भिडिओ यतिबेला सामाजिक सञ्जालमा समेत भाइरल भइरहेका छन्।
उक्त सांगीतिक साँझ दर्शक तथा स्रोताका लागि पनि थप विशेष रह्यो। सांगीतिक साँझमा एलिना र अर्की गायिका समीक्षा अधिकारीले संगै स्टेज सेयर गरे।
पछिल्लो पुस्ताका दुई चर्चित गायिकाको लाइभ प्रस्तुतिमा दर्शकले भरपूर साथ दिए। उनीहरूले संगै 'दुश्मन हेरेको हेर्यै' लगायतका गीत एकसाथ गाए। यी दुवैको स्वर रहेको सो गीत निकै चर्चित बनेको थियो।
सोही स्टेजमा एलिनाले आफ्नो रिलिजको तयारीमा रहेको गीत सुनाएकी हुन्।
यता पनि नजा भन्थ्यो, उता पनि नजा
अहिले रोक्ने कोही नि छैन, मलाई कति मज्जा
गाएकै छु क्यारे, नाचेकै छु क्यारे
उसले छोड्दा मर्छु जस्तै लाग्यो, छाड्यो
बाँचेकै छु क्यारे, बाँचेकै छु क्यारे
दुश्मन जलिरहन्छ, जीवन चलिरहन्छ
यी शब्दहरूले सम्बन्धबाट मुक्त भएपछिको स्वतन्त्रता र आत्मबलको भावनालाई अभिव्यक्त गर्छ। कसैले बाँधेर राख्न खोज्दा पनि जीवन आफ्नो गतिमा अगाडि बढ्छ र दुश्मनहरू जल्दा पनि आफ्नो यात्रा चलिरहन्छ भन्ने सन्देश यस गीतमा रहेको अनुमान गर्न सकिन्छ।
एलिना चौहानले स्टेजमा उक्त गीत प्रस्तुत गर्दा दर्शकहरूले उनलाई हौसला प्रदान गरेका थिए। उनले यो आफूले आशा गरेको गीत रहेको पनि बताएकी छिन्।
-1746009348.jpg)
