ऋषभ शेट्टीको निर्देशनमा बनेको 'कान्तारा च्याप्टर १' ले बक्स अफिसमा उत्कृष्ट प्रदर्शन गरिरहेको छ।
यो कन्नड पिरियड एक्सन फिल्मले प्रदर्शनको पहिलो सप्ताहन्तमै विशेषगरी भारतमा बलियो व्यापार गर्यो। सोमबार सामान्य गिरावट देखिए पनि मंगलबार फिल्मको व्यापार फेरि उकालो लागेको छ।
भारतीय सञ्चारमाध्यम हिन्दुस्तान टाइम्सका अनुसार यो फिल्मले विश्वभर ४०० करोड भारतीय रूपैयाँको आँकडा पार गरिसकेको छ। गत बिहीबारदेखि प्रदर्शनमा आएको फिल्मले ६ दिनको प्रदर्शनमा भारतमा मात्र २९०.२५ करोड भारू नेट (३४८ करोड ग्रस) कमाइसकेको छ।
हिन्दुस्तान टाइम्सले उल्लेख गरेअनुसार ६ दिनमा अन्तर्राष्ट्रिय बजारको कमाइ जोडेर विश्वव्यापी कुल संकलन ४१४ करोड भारू पुगेको छ।
दोस्रो सर्वाधिक कमाउने कन्नड फिल्म
आइतबार, 'कान्तारा च्याप्टर १' ले 'केजीएफ च्याप्टर १' को लाइफटाइम कमाइलाई पार गरेको थियो। मंगलबारको कमाइसँगै यसले सन् २०२२ मा रिलिज भएको पहिलो 'कान्तारा' लाई पनि उछिन्यो, जसले विश्वभर ४०८ करोड भारू कमाएको थियो।
यो अब 'केजीएफ च्याप्टर १' (१२५० करोड भारू) पछि अहिलेसम्मकै दोस्रो सर्वाधिक कमाइ गर्ने कन्नड फिल्म बनेको छ।
ऋषभ शेट्टीद्वारा लिखित तथा निर्देशित 'कान्तारा च्याप्टर १' सन् २०२२ को सुपरहिट फिल्म 'कान्तारा' को प्रिक्वेल हो। फिल्ममा ऋषभका साथमा रुक्मिणी वसन्त, जयराम र गुलशन देवैया पनि मुख्य भूमिकामा छन्।
-copy-1761394385.jpg)
-1746009348.jpg)
