चर्चित टेलिभिजन शो 'कमेडी दरबार' टिमले फिल्म निर्माण गर्ने भएको छ।
निर्माण टिमले सोमबार एक पोस्टर ल्याउँदै फिल्म 'क का कि की' निर्माणको घोषणा गरेको हो।
पोस्टरअनुसार फिल्ममा नेपाली चर्चित कलाकारहरू गौरी मल्ल, तृप्ति नाड्कर, रेखा थापा र महेश त्रिपाठीको मुख्य भूमिका रहनेछ। त्यस्तै, टिकटकर मिस पबी, कलाकार पवन खतिवडा, हिमेश पन्त, सुजता श्रेष्ठ, विश्वास तिम्सिना, सीडी विजय अधिकारीलगायत कलाकारहरूको पनि विशेष भूमिका रहनेछ।
फिल्मको शीर्षक, घोषणा गरिएको पोस्टरमा देखाइएका कलाकारहरूको भाव र निर्माण टिमको जनराअनुसार यो फिल्म पूर्ण कमेडी शैलीमा निर्माण हुनेछ।
फिल्मको निर्देशन विक्की अग्रवाल र श्रद्दा प्रसाईंले संयुक्त रूपमा गर्नेछन्। माया इन्टरटेन्मेन्ट स्टुडिओको प्रस्तुति रहने फिल्मको निर्मातामा श्रद्दा प्रसाईं र सुमित्रा थापा छन्।
फिल्मको पटकथा विक्की अग्रवालले लेखेका हुन् भने कथा लेखनमा विक्कीलाई विकास अर्याल र सरोज भण्डारीको साथ रहनेछ।
सुदिप बराल छायांकन निर्देशक (डीओपी) रहने फिल्मको थिम पोस्टर रोयल भिमसेनले तयार गरेका हुन्।
हाल टेलिभिजनमा निकै लोकप्रिय 'कमेडी दरबार' सञ्चालन गरिरहेको निर्देशक अग्रवालको टिमको यो पहिलो फिल्मी प्रोजेक्ट हुनेछ।
निर्देशक अग्रवालका अनुसार फिल्मको छायांकन आगामी दसैंको टिकाको अर्को दिनबाट प्रारम्भ हुनेछ। फिल्मको बजेट र प्रदर्शन मिति हाल खुलाइएको छैन।
फिल्म घोषणापछि निर्देशक बिक्की अग्रवालले भने, –'आफ्नो फिल्मी करिअरको सुरुआत नै अग्रजहरूसँग सहकार्य गर्ने उत्कृष्ट अवसर पाएको छु। 'क का कि की' को यस यात्रामा हामीलाई विश्वास छ कि सम्पूर्ण दर्शकहरूको साथ फेरि पनि प्राप्त हुनेछ। हाम्रो टिम ‘कमेडी दरबार’ को एउटै उद्देश्य अब टेलिभिजनसँगै हलहरूमा पनि तपाईंहरूको हाँसो ल्याउनु हो।'
फिल्मको स्वदेश वितरण श्री वेंकेटेश, अन्तर्राष्ट्रिय वितरण सेभेन सिजले र डिजिटल अधिकार ओएसआर डिजिटलले लिने भएका छन्।
-1746009348.jpg)
