फिल्म 'फेरि रेशम फिलिली' को दोस्रो गीत सार्वजनिक गरिएको छ।
बिहीबार काठमाडौंमा आयोजित एक कार्यक्रमकाबीच ‘फेरि जालमा’ बोलको गीत रिलिज गरिएको हो।
झन्डै एक दशकअघि रिलिज गरिएको 'पारी त्यो डाँडामा' गीत भाइरल भएको थियो। 'रेशम फिलिली' फिल्ममा समावेश सोही गीतको दोस्रो भाग अर्थात् रि-क्रियट गरेर 'फेरि जालमा' ल्याइएको हो। कालीप्रसाद बाँस्कोटाको संगीतमा तयार भएको गीतको शब्द मानस राजले लेखेका हुन्। गायन कालीप्रसाद र सोमिया बराइलीको छ।
यो गीतको भिडिओमा प्रदिप लामाको कोरियोग्राफी र शिवराम श्रेष्ठले छायांकन छ। गीतमा फिल्मका मुख्य कलाकार विनय श्रेष्ठ र सुपुष्पा भट्ट फिचर्ड छन्।
यो फिल्मलाई निरज महर्जनले लेखन तथा निर्देशन गरेका हुन्। फिल्ममा विनय र सुपुष्पासहित कामेश्वर चौरासिया, नीर शाह, प्रकाश घिमिरे, शिशिर वाङ्देल, रविन्द्र झा, लक्ष्मी गिरी, महेश त्रिपाठी, एवनराज उप्रेती, मेक्सम गौडेल, प्रकाश घिमिरे, सजन थापा लगायतको अभिनय छ। यो फिल्ममा ‘रेशम फिलिली’ का निर्देशक प्रनव जोशी र अभिनेत्री मेनुका प्रधान बाहेकको अधिकांश टिम पुरानै हो।
सुसन प्रजापतीको छायांकन, निर्देशक महर्जन र आकाश बरालको पटकथा, नरेश किङ्ग योगीको द्वन्द्व निर्देशन तथा कालीप्रसाद बाँस्कोटा, एसडी योगी, हर्क साउद, जयन जे वाइवा र दीपक शर्माको संगीत र सुरेन्द्र पौडेलको सम्पादन फिल्ममा छ।
सिनेमा आर्ट र वि मोसन पिक्चर्सको सहकार्यमा निर्माण भएको सिनेमामा रौनक विक्रम कंडेल निर्माता तथा कार्यकारी निर्माता सुरज बम ठकुरी र सह–निर्मातामा एनी थापा छन्।
'फेरि रेशम फिलिली' महाशिवरात्रिको अवसर पारेर फागुन १४ गतेबाट प्रदर्शनमा आउने तयारीमा छ।
