दीपक रौनियार निर्देशित फिल्म 'हाइवे' युट्युबमा रिलिज भएको छ।
हलमा रिलिज भएको १२ वर्षपछि बाँसुरी फिल्म्सको युट्युब च्यानलमा मंगलबार बेलुका फिल्म सार्वजनिक गरिएको हो।
६२ औं बर्लिन फिल्म फेस्टिभलमा वल्र्ड प्रिमियर भएको फिल्म २०६९ सालमा नेपाली हलमा रिलिज भएको थियो।
'हाइवे' मा दयाहाङ राई, आशा मगराती, सृष्टि घिमिरे, ऋचा शर्मा, कार्म, राजन खतिवडा, रविन्द्र मिश्र, निर्मला राई, इलम दीक्षित, सौगात मल्ल, भूमिका श्रेष्ठ, विनय श्रेष्ठ र सन्दीप क्षेत्रीको अभिनय छ।
फिल्ममा सशस्त्र द्वन्द्वपछिको पृष्ठभूमिमा पूर्वी नेपालबाट काठमाडौंसम्मको बस यात्रामा निस्किएका एक अर्कामा गाँसिएका पाँच भिन्न–भिन्न सम्बन्धको कथा देखाइएको छ।
बस यात्रा गर्ने क्रममा उनीहरूले भोगेको समान पीडाको कथा यसमा छ। फिल्मको कथा केदार शर्मा, खगेन्द्र लामिछाने र दीपक रौनियारले लेखेका हुन् भने अविनाशविक्रम शाहको पटकथा छ।
दीपक रौनियारको अघिल्लो फिल्म 'सेतो सूर्य' पनि दुई साताअघि युट्युबमा आएको छ। आगामी फिल्म 'राजागंज' चैत १ मा रिलिज हुँदैछ।
