गायक एवं संगीतकार टंक बुढाथोकी फिल्म निर्माणको तयारीमा छन्।
उनले आफ्नो हिट गीत 'मन बिनाको धन ठूलो कि धन बिनाको मन' नाममा फिल्म निर्माण तथा निर्देशन गर्न लागेका हुन्।
यो फिल्मको शीर्ष कलाकारमा बाल गायक अशोक दर्जी हुनेछन्।
फिल्ममा अभिनय गर्ने अन्य कलाकारहरू समेत तय गरिएको छ।
फिल्ममा अशोकसँगै सरोज खनाल, नीता ढुंगाना, रमेश विश्वकर्मा, बुद्धि तामाङ, रवीन्द्र झा, एआर बुढाथोकी, शंकर श्रेष्ठ, साम्राज्ञी थापा लगायत कलाकारहरूको अभिनय रहनेछ। अन्य केही प्रमुख कलाकारहरू अझै फाइनल हुन बाँकी रहेको टंक बुढाथोकीले बताए।
फिल्मको कथा निर्माता तथा निर्देशक टंक बुढाथोकी आफैले लेखेका छन्। पटकथा र संवाद शिवम अधिकारीले लेखेका छन्। छिट्टै फ्लोरमा जाने तयारीमा रहेको फिल्मलाई सौरभ लामाले छायांकन गर्नेछन्।
फिल्म सामाजिक विषयवस्तुमा निर्माण हुनेछ। यसलाई बैंकटेश इन्टरटेनमेन्टले वितरणको जिम्मा लिएको छ।
