दीवाकर भट्टराईको निर्देशनमा निर्माण भएको फिल्म 'मायावी' को रिलिज मिति घोषणा गरिएको छ।
निर्माणपक्षले फिल्मको पोस्टर सार्वजनिक गर्दै फिल्म फागुन १४ गते रिलिज हुने घोषणा गरेको हो।
यसअघि पटकपटक प्रदर्शन मिति परिवर्तन भएको यो फिल्म अब महाशिवरात्रीको अवसर पारेर प्रदर्शनमा आउने भएको हो।
यो फिल्मले प्रदर्शन मिति घोषणा गरेसँगै महाशिवरात्रिमा बक्स अफिसमा दुई फिल्मको भिड्न्त तय भएको छ।
यसअघि सो मितिमा कुमार कट्टेल 'जिग्री' र अर्जुन घिमिरे 'पाँडे' को फिल्म 'लाज शरणम्' को प्रदर्शन तय छ।
'मायावी' को निर्माणपक्षले सार्वजनिक गरेको पोस्टरमा मुख्य दुई कलाकार पल शाह र दीपिका प्रसाईं फिचर्ड छन्। उनीहरू दुवै भावुक देखिएका छन्। पलको आँखाबाट आँशु झरेको देख्न सकिन्छ। उनी दीपिकालाई हेरेर रोहिरहेका छन्। दीपिकाको अनुहार मलिन देखिएको छ।
'मायावी' मा पल र दीपिकासँगै सुशील सिटौला, समिम खान, करिश्मा श्रेष्ठ, प्रशान्त ताम्राकार, लक्ष्मी गिरी, रवि डंगोल, राजाराम पौडेल, अंशु महर्जन, रमा प्रसाईं लगायतको अभिनय छ।
'म्यान हन्ट इन्टरनेश्नल नेपाल २०१६' का विजेता समेत रहेका समिमले यसै फिल्ममार्फत डेब्यु गर्दैछन्।
निर्देशक भट्टराई स्वयंको लेखन रहेको फिल्मको कथा पोखराको परिवेशमा तयार पारिएको छ।
क्रिएटिभ सिने आट्र्सको प्रस्तुतिमा निर्माण भएको फिल्ममा राजु थापाको डीओपी, शम्भुजित बास्कोटा र एसडी योगीको संगीत, राम अविरल र दयाराम पाण्डेको गीत रचना छ।
ध्रुव न्यौपाने, राज कटुवाल र चन्द्र पन्त निर्माता रहेको फिल्मको सह–निर्मातामा मञ्जु भण्डारी, राजु पराजुली र सुमित ओली छन्। प्रविन भट्टराई र करण सिंह कार्यकारी निर्माता हुन्।
