प्रधानमन्त्री केपी शर्मा ओलीले जनतालाई विभिन्न नाममा भड्काएर राष्ट्रिय एकता भाँड्ने प्रयासलाई चिर्न खेलाडीहरूलाई आग्रह गरेका छन्।
नेपाल खेलकुद महासङ्घको केन्द्रीय कमिटीको तेस्रो बैठकको उद्घाटन सत्रलाई आज सम्बोधन गर्दै उनले अनेक प्रकारका शक्तिहरूले धर्म, जात र विभिन्न नाममा राष्ट्रिय एकता भाँड्न र जनतालाई भड्काउन सक्ने भएकाले राष्ट्रिय एकतालाई कायम राख्न जोड दिए।
‘यति सानो देशमा हामी धेरै जाति, भाषी र जाति मिलेर बसेका छौं। यो हाम्रो सम्पन्नता र जीवित सम्पदा हो,’ प्रधानमन्त्री ओलीले भने, ‘हामीले राष्ट्र र जनताको मन विखण्डित हुन दिनु हुँदैन। खेल क्षेत्र कुनै जात र धर्म विशेषको हुँदैन। यहाँ उत्कृष्टताका आधारमा खेलाडीको प्रतिनिधित्व हुन्छ। कुनै जातको वा धर्मको प्रतिनिधित्व खोइ भनेर सोध्ने वा भड्काउने काम यस क्षेत्रमा हुँदैन। यहाँ विधि, पद्धति र नियमको पालना हुन्छ। यो अनुशासनको कुरालाई समाजव्यापी बनाउने हाम्रो काम हुनुपर्छ।’
उनले जनताको शासनका रूपमा रहेको लोकतन्त्रमा विधि नमान्ने र सनकका भरमा चल्ने प्रवृत्तिले समाजलाई कहीँ नपुर्याउने पनि बताए।
अहिले समाजमा भ्रष्टहरूले नै भ्रष्टाचारविरोधी नाटक गरेर जनता अल्मलाउने र भ्रष्टाचार नगर्नेलाई तथानाम गाली गरेर असत्य फैलाउन लागेकाले सत्यका पक्षमा प्रस्तुत हुन प्रधानमन्त्री ओलीले आग्रह गरे।
देशमा शान्ति, सुव्यवस्था र कानुनको राज नहोस् भने वितण्डा मच्याउन खोज्ने, सरकार र देशलाई असफल पार्ने प्रयास पनि हुन सक्ने हुँदा सचेत भएर लाग्न प्रधानमन्त्री ओलीको सुझाव छ।
'समाजमा योगदान नगरेकाहरूलाई तारिफ गरेर माथि उठाउने र लोकतन्त्रका लागि योगदान गरेकाहरूलाई गाली गर्ने काम भइरहेको छ। म तपाईंहरूलाई भन्न चाहान्छु, अहिलेको सरकार भ्रष्टाचार नियन्त्रणका लागि र सुशासन कायमका लागि बनेको हो,’ उनले भने, ‘यसमा हामी शून्य सहनशीलता अपनाउँछौं। अनुहार र मुख हेरेर कसैलाई पक्ष विपक्ष गरिँदैन। सभ्य, आधुनिक, समृद्ध र सुखी नेपालको विकासमा हामी लाग्नेछौं।’
प्रधानमन्त्री ओलीले खेल क्षेत्रलाई उठाउने र यसका सबै विधालाई जीवनशैलीका रूपमा अपनाउने कामको नेतृत्व गर्ने जिम्मेवारी निर्वाह गर्न आग्रह गरे। उनले बालबालिकादेखि बुढाबुढीसम्मलाई आफ्नो क्षमता र रूचिअनुसार खेल एक जीवनको अंग भएकाले खेललाई व्यापकीकरण र सामाजिकीकरण गर्न आग्रह गरे।
खेलले मनोरञ्जन, व्यायाम र प्रतिस्पर्धाको अवसर दिने बताउँदै उनले सबै पेसा व्यावसायका मानिसका लागि खाना, काम, व्यायाम र व्यायामको प्रबन्ध नभए जीवन कुँजो हुने बताए।
‘नेपाली खेलाडीले विश्वस्तरका प्रतिस्पर्धामा स्वर्ण पदक नपाउने भन्ने के छ? हामीले रसियाली र अरबियाली सबैसँग प्रतिस्पर्धा गर्न सक्छौं। हामीले ओलम्पिकमा सहभागी मात्र हुन थालेका छौं। अब जित्नुपर्छ,’ प्रधानमन्त्रीले भने, 'उत्कृष्ट र प्रतिस्पर्धीरूपमा खेलेमा हामीलाई जीतका लागि केहीले पनि रोक्दैन। सरकारले यस क्षेत्रको विकासका लागि गर्नुपर्ने काम गच्छेले भ्याएसम्म गर्नेछ। कीर्तिपुरको रंगशालालाई स्तनोन्नति गर्न दिइएको प्राथमिकता यसैको उदाहरण हो।’
यस्तै महासंघमा आबद्ध युवाहरूको उत्तरदायित्व खेलमा श्रेष्ठताका साथै समृद्ध, सुरक्षित, सम्मानित र न्यायोचित समाज निर्माणका लागि सचेत प्रयास गर्नु पनि भएको उनले बताए। देशको स्वाधीनता, लोकतन्त्र, विधि र सार्वभौमसत्ता, भौगोलिक अखण्डताको रक्षा र राष्ट्रिय झण्डलाई माथि उठाउनका लागि पनि उत्तिकै भूमिका हुनुपर्नेमा प्रधानमन्त्रीले जोड दिए।
