सिद्धार्थ बैंक नेपाल प्रिमियर लिग (एनपिएल) मा पोखरा एभेन्जर्सले घरेलु खेलाडी विपिन खत्रीको उत्कृष्ट बलिङको मद्दतमा पहिलो जित निकालेको छ।
यसअघि लगातार दुई खेलमा पराजित भएको पोखराले बिहीबार भएको दिनको दोस्रो खेलमा साविक विजेता जनकपुर बोल्ट्सलाई २५ रनले पराजित गरेको हो।
जनकपुर भने लगातार तीन खेलमा पराजित भइसकेको छ भने अंक तालिकाको पुछारमा छ। जनकपुर मात्र जारी सिजनमा अहिलेसम्म जित हासिल गर्न नसक्ने टोली बनेको छ। पोखराले भने दुई खेलको हारको यात्रा समाप्त गरेको छ।
कीर्तिपुरस्थित त्रिवि मैदानमा पोखराले दिएको १५६ रनको लक्ष्य पछ्याएको जनकपुरले ९ विकेटको क्षतिमा १३० रन मात्र जोड्न सक्यो।
जनकपुरको सुरूवात राम्रो हुन सकेन। उसले पहिलो ओभरमै दुई विकेट गुमाउन पुग्यो।
२८ वर्षीय देब्रे हाते स्पिनर विपिन खत्रीले पहिलो ओभरमा उत्कृष्ट सुरुवात गरे। चौथो बलमा उनले आसिफ शेखलाई शून्यमा विकेट पछाडि एडम रोसिङटनबाट क्याच गराए। अन्तिम बलमा शुभ कंसाकारलाई ४ रनमा बोल्ड गरे।
चौथो ओभरमा जनकपुरले फेरि दुई विकेट गुमायो। सुमित बर्माले पहिलो बलमा यान निकोललाई २ रन र अन्तिम बलमा पाकिस्तानी अलराउन्डर माज सदाकतलाई २० रनमा क्याच गराए।
पाकिस्तानका सदाकतले एनपिएलमा डेब्यू गर्दा १४ बलमा १ चौका र २ छक्का प्रहार गरे। यसरी पावरप्लेमा चार विकेट गुमाएको जनकपुरले सातौं ओभरमा कप्तान अनिलकुमार साह पनि पेभिलियन फर्के। उनलाई पनि विपिनले नै तृतराज दासबाट १ रनमा क्याच गराए।
दुई ओभरपछि विपिनले अर्को विकेट लिए। मयन यादवलाई पनि दासबाटै ४ रनमा समातिए। नौ ओभरभित्रै आफ्नो चार ओभरको स्पेल पूरा गरेका विपिनले चार विकेट लिए भने १५ रन मात्र खर्चिए।
सञ्जय कृष्णमूर्तिले २५ रन बनाउन सके। यो नै मध्यक्रमका ब्याटरले जोडेको सर्वाधिक रन बन्यो। उनलाई पोखराका कप्तान कुशल भुर्तेलले किरण ठगुन्नाबाट १३औं ओभरमा क्याच गराउँदै पेभिलियन फर्काए।
रूपेश सिंहलाई पोखराका जिमी निशमले ७ रनमा आउट गरे। अन्तिममा वायन पार्नेलले जनकपुरका लागि अर्धशतक प्रहार गरे पनि त्यो जितका लागि पर्याप्त हुन सकेन। उनले अन्तिम ओभरमा रिटार्ट हर्ट हुनुअघि ३८ बलमा २ चौका र ४ छक्काको मद्दतमा ५० रन जोडे। दक्षिण अफ्रिकाका पार्नेलले सिजनमा पहिलो खेल खेलेका हुन्।
बलिङमा पोखराका विपिन खत्रीले ४ विकेट लिए भने सुमित बर्माले २ विकेट हात पारे।
त्यसअघि टस जितेर पहिले ब्याटिङ गरेको पोखराले सुमित बर्माको अर्धशतमा ६ विकेटको क्षतिमा १५५ रन बनायो।
पोखराका लागि ओपनरद्वय दिनेश खरेलले ३८ रन र एडम रोसिङटनले २४ रन बनाए। रोसिङटन आठौं ओभरको तेस्रो बलमा जनकपुरका सन्जय कृष्णमूर्तिको बलमा क्याच भए। उनले खरेलसँग ६१ रनको साझेदारी गरे। लगत्तै अर्को बलमा पोखरा कप्तान कुशल गोल्डन डक भए। उनलाई कृष्णमूतिले बोल्ड गरे।
दशौं ओभरमा खरेललाई पोखारका कप्तान अनिल साहले क्याच गराएका थिए।
अर्को ओभरमा जिमी निशम पनि १ रनमै आउट हुँदा पोखरा दबाबमा पर्यो। निशमलाई पनि कृष्णमूर्तिले सिकार बनाएका थिए।
त्यसपछि सुमित बर्मा र तृतराज दासबीच पाँचौ विकेटक लागि ७२ रनको साझेदारी भयो। दास १९औं ओभरमा २९ रनमा रनआउट हुन पुगेका थिए। उनले २८ बलमा २ चौका प्रहार गरे।
अन्तिम ओभरमा डान डाउथवेटलाई ललित राजवंशीले ७ रनमा क्याच गराए। पहिलो बलमा छक्का प्रहार गरे लगत्तै डान क्याच भएका थिए।
तर अन्त्यमा सुमित बर्माले अर्धशतक प्रहार गरेपछि पोखरालाई राहत भयो। बर्माले नटआउट ५० रन बनाउने क्रममा २९ बलमा २ चौका र ४ छक्का प्रहार गरे। भारतमा जन्मिएर त्यहिँ क्रिकेट सिकेका बर्मा अहिले युगान्डाको राष्ट्रिय टोलीबाट खेल्छन्।
अन्तिम ओभरमा ललित राजवंशीले १७ रन खर्चिदा पोखराले १५० रन कटाएको थियो।
बलिङमा जनकपुरका सन्जय कृष्णमूर्तिले ३ विकेट लिए भने ललित राजवंशी र अनिल साहले १-१ विकेट लिन सफल भए।
-1756446574.jpg)
-1746009348.jpg)
