महिला राष्ट्रिय लिगमा त्रिभुवन आर्मी क्लबले उपाधि होडमा एपिएफ क्लबमाथिको दबाब कायमै राखेको छ।
मंगलबार भएको खेलमा आर्मीले वालिङ नगरपालिका स्याङ्जालाई २-० गोलले पराजित गर्यो। जितसँगै आर्मीले उपाधि जित्ने सम्भावना कामयै राख्यो।
आर्मीको जितमा शर्मिला थापाले पहिलो गोल गरेकी थिइन्। वालिङकी पुष्पा गुरुङले आफ्नै पोस्टमा गोल गरेपछि आर्मीको अग्रता दोब्बर भएको थियो।
शर्मिलाले खेलको पहिलो मिनेटमै गोल गरेकी थिइन्। पुष्पाले पहिलो हाफ सकिन तीन मिनेट बाँकी छदा आत्मघाती गोल गर्दा वालिङ पहिलो हाफमा २-० ले पछि परेको थियो।
जितसँगै आर्मीले अंक तालिकाको शीर्ष स्थानमा रहेको नेपाल एपिएफ क्लबसँगको अंक दूरी २ अंकमा झारेको छ।
आर्मीले ८ खेलबाट १९ अंक जोडेको छ। शीर्ष स्थानको एपिएफको ७ खेलबाट २१ अंक छ।
वालिङ अंक तालिकामा तेस्रो स्थानमा छ। उसले ११ अंक जोडेको छ।
जितपछि आर्मीका प्रशिक्षक राजु तामाङले बलियो प्रतिद्वन्द्वीविरुद्ध ३ अंक जोड्न सकेकोमा खुसी व्यक्त गरे।
'सुरुमै गोल गर्दा हामीलाई फाइदा पुग्यो। विपक्षी स्ट्राइकरलाई रोक्न हाम्रा डिफेन्डर पनि सफल भए,' तामाङले भने।
वालिङका प्रशिक्षक दिलिप थापाले सुरुमै गोल खादा दबाब झेल्नु परेको बताए।
-1746009348.jpg)
