अविरल वर्षापछि झरेको पहिरोको कारण बुटवल–पाल्पा सडक खण्ड पूर्णरूपमा बन्द भएको छ। सिद्धार्थ राजमार्गअन्तर्गत् तिनाउ गाउँपालिका वडा नम्बर–३ सिद्धबाबा मन्दिरनजिक पहिरो झरेको प्रहरीले जनाएको छ।
आइतबारदेखि परेको अविरल वर्षापछि सिद्धबाबा खण्डमा दुई–तीन ठाउँमा पहिरो खसेको प्रहरीले बताएको छ।
पहिरो झरेपछि सोमबार रातिदेखि नै सवारी साधनहरू आवागमन पूर्ण रूपमा बन्द गरिएको प्रहरी चौकी दोभानले जानकारी दिएको छ।
सिद्धबाबा मन्दिरनजिक सडक माथिबाट ठूलो चट्टान सहितको पहिरो खसेपछि सडक दुवैतर्फबाट अवरूद्ध भएको हो।
अहिले पनि पानी परिरहेको र ठुल्ठूला ढुंगासहितको पहिरो झर्ने क्रम नरोकिएकोले पहिरो हटाउन नसकिएको प्रहरीले जनाएको छ।
निरन्तर पहिरो खसेकाले डोजर पनि पठाउन नसकिएको प्रहरीले जानकारी दिएको छ।
सोही स्थानमा पहिरो झरेका कारण सोमबार पनि बिहान १० बजेदेखी अपराह्न ४ बजेसम्म सडक अवरुद्ध बनेको थियो।
-1746009348.jpg)
