प्रधानमन्त्री केपी शर्मा ओलीले भक्तपुरको सूर्यविनायक नगरपालिकामा ५० हजार दर्शक क्षमताको फुटबल रंगशाला बनाउने कुरा दोहोर्याएका छन्।
बिहीबार 'फिफा फुटबल फर स्कुल' कार्यक्रमको उद्घाटन गर्दै उनले सूर्यविनायकमा रंगशाला बनाउने कुरा दोहोर्याएका हुन्।
अघिल्लो महिना उनले राष्ट्रिय खेलकुद परिषदको कार्यक्रममा सूर्यविनायकमा रंगशाला बनाउने घोषणा गरेका थिए।
उनले हालको दशरथ रंगशालाको १५ हजार दर्शक क्षमता नेपाली फुटबलप्रेमीका लागि साँघुरो बन्दै गएकोले सरकार ठूलो रंगशाला निर्माणमा जुटेको बताए।
प्रधानमन्त्री ओलीले आफ्नो भनाइमा खेलकुद पूर्वाधार निर्माणमा सरकारको प्रतिबद्धता व्यक्त गर्दै भने,
‘यो (दशरथ) रङ्गशाला १५ हजार दर्शक अटाउने हो, अब यो सानो भयो। हामी छिट्टै भक्तपुरको सूर्यविनायकमा ५० हजार दर्शक क्षमताको रङ्गशाला बनाउँछौँ। कीर्तिपुरमा क्रिकेट रङ्गशाला गत वर्ष सुरु गरेका थियौँ, अहिले पूरा हुनै लागेको छ। झापा र धनुषामा पनि अन्तर्राष्ट्रिय स्तरको रङ्गशाला बनाउँदैछौँ। अब खेल सिक्नका लागि खेल मैदानको कमी हुनेछैन। महिला फुटबलका लागि पनि अभ्यास गर्ने ठाउँ र रङ्गशाला हामी तयार गरिरहेका छौँ।”
उनले कीर्तिपुरस्थित क्रिकेट मैदानको स्तरोन्नति कार्य अन्तिम चरणमा पुगेको र ऐतिहासिक दशरथ रङ्गशालाको पनि थप मर्मतसम्भार गरिने जानकारी दिए। महिला फुटबलका लागि समेत पूर्वाधार तयार भइरहेको बताउँदै उनले अब खेलाडीहरूलाई अभ्यास गर्न मैदानको कमी नहुने प्रतिबद्धता जनाए।
-ink-1753955654.jpeg)
-1746009348.jpg)
