एसियाली फुटबल महासंघ (एएफसी) ले प्रदान गर्ने क्लब लाइसेन्स प्राप्त गरेसँगै नेपालको त्रिभुवन आर्मी फुटबल क्लबले एएफसी कप २०२१ मा सहभागिता जनाउने भएको छ।
एएफसी कप एसियाली फुटबल महासंघले आयोजना गर्ने एएफसी च्याम्पियन्स लिगपछिको दोस्रो ठूलो क्लब स्तरीय प्रतियोगिता हो।
अखिल नेपाल फुटबल संघ (एन्फा) ले मंगलबार नाम दर्ता गराएसँगै आर्मीले एएफसी कप खेल्ने भएको हो। आर्मीले मंगलबार नै एएफसी क्लब लाइसेन्स पाएको थियो।
अब आर्मीले आगामी अप्रिलमा सुरू हुने कपको प्लेअफ चरणमा प्रतिस्पर्धा गर्नेछ।
दक्षिण एसिया क्षेत्रको समूहमा चार टिमबीच प्रतिस्पर्धा हुने नियम छ। जसमा तीन देशका टिमलाई सिधैं स्थान दिइएको छ। एक स्थानका लागि प्लेअफ खेल्नु पर्ने नियम छ।
दक्षिण एसियाको शीर्ष वरीयतामा रहेका भारत, बंगलादेश र माल्दिभ्सका एक–एक टिमले समूह चरणमा स्थान बनाइसकेका छन्।
एक स्थानका लागि प्लेअफ हुनेछ। प्लेअफमा पनि भारत, बंगलादेश र माल्दिभ्सका थप एक–एक टिमले स्थान पाउनेछन्।
यस्तै वरीयताको चौथो स्थानमा रहेको नेपाल, श्रीलंका र भुटानका एक–एक टिमले पनि प्लेअफ खेल्नेछन्। यसरी ६ टिमबीच हुने प्लेअफबाट एक टिमले दक्षिण एसिया क्षेत्रको समूहमा प्रतिस्पर्धा गर्न पाउनेछ।
एएफसीका लागि क्लब लाइसेन्स अनिवार्य भएकाले यसअघि नेपालको तर्फबाट कुनै पनि टिमको नाम दर्ता गरिएको थिएन।
गत वर्षको ए डिभिजन लिगमा रेलिगेनशन परेको सरस्वती क्लब बाहेक १३ ए डिभिजन क्लबले क्लब लाइसेन्सका लागि निवेदन दिएका थिए। तर १३ वटै क्लबको मापदण्ड नपुगेको भन्दै एएफसीले लाइसेन्स दिन अस्विकार गरेको थियो।
त्रिभुवन आर्मी क्लबले अपिल गरेपछि मात्र एएफसीले मंगलबार क्लब लाइसेन्स प्रदान गरेको हो।
आर्मीले गत वर्षको लिगमा दोस्रो स्थान हात पारेको थियो। फागुन पहिलो साता सकिएको लिगको अन्तिम खेलमा मच्छिन्द्र क्लबसँग पराजित भएपछि आर्मी लिगको उपाधि पहिलो पटक जित्नबाट बञ्चित बनेको थियो।
लिग जित्न नसके पनि आर्मीले क्लब लाइसेन्सका लागि मापदण्ड पूरा गरेर एएफसी क्लब लाइसेन्स प्राप्त गर्यो। यदि मच्छिन्द्रले मापदण्ड पूरा गरेको भए उसैले एएफसी कप खेल्न पाउने थियो।
क्लब लाइसेन्सका लागि आफ्नै मैदान, ए लाइसेन्स प्राप्त प्रशिक्षक, एकेडेमी, युवा टिम, टिम डाक्टर, मिडिया म्यानेजर लगायतका मापदण्ड पूरा गर्नु पर्ने प्रावधान छ।
एएफसी कप २०२१ का लागि लाइसेन्स पाउने एसियाली देशका क्लबहरूको सूची हेर्न यहाँ क्लिक गर्नुस्।
-1754812957.jpeg)
-1746009348.jpg)
