इंग्लिस प्रिमियर लिगमा म्यानचेस्टर सिटीले आफ्नो सानदार लयलाई जारी राख्दै लगातार एघारौं जित निकाल्ने क्रममा हडरस्फिल्ड टाउनलाई २–१ ले पराजित गरेको छ।
पछि परेको खेलमा नजिता उल्टाएको सिटीको लागि सर्जियो अग्युरो र रहिम स्टर्लिङले गोल गरेका थिए। पहिलो हाफको अन्तिम मिनेटमा निकोलास ओटामेन्डीले आफ्नै पोस्टमा गोल गरेपछि सिटी खेलमा पछि परेको थियो।
दोस्रो हाफको दोस्रो मिनेटमा अग्युरोले पेनाल्टीमार्फत बराबरी गोल गरे। ८४औं मिनेटमा इङ्लिस स्ट्राइकर रहिम स्टर्लिङले गोल गरेपछि सिटीले अग्रता लिएको थियो।
आइतबार भएका अन्य खेलमा आर्सनलले बर्नलीलाई १–० तथा साउथह्याम्टनले इभर्टनलाई ४–१ ले पराजित गरेका छन्।
लिगको १३ चरणका खेल सकिँदा सिटी ३७ अंक जोडेर शीर्ष स्थानमा छ। दोस्रो स्थानको म्यानचेस्टर युनाइटेडको २९ अंक छ भने तेस्रो स्थानको चेल्सीको २६ अंक छ।
यससँगै सिटीले आफ्नो एघारौँ खेलमा पनि विजयी हासिल गरेर नयाँ कीर्तिमान बनाउने मार्गमा अग्रसर छ।
