आउँदो वर्ष रुसमा हुने विश्वकप फुटबलको तयारी स्वरूप भएको अन्तर्राष्ट्रिय मैत्रिपूर्ण खेलमा स्पेनले कोष्टारिकामाथि शानदार जित दर्ता गरेको छ।
घरेलु मैदानमा शनिबार राति भएको खेलमा स्पेनले कोस्टारिकालाई ५–० ले हराउँदै आफ्नो दबदबा कायमै राखेको हो।
स्पेनका जितमा डेविड सिल्भाले दुई तथा जोर्डी अल्बा, अल्भारो मोराटा र इनिएस्टाले एक एक गोल गरे। पहिलो हाफमा दुई तथा दोस्रो हाफमा तीन गोल गरेको स्पेनका लागि छैटौं मिनेटमा नै अल्बाले गोल गर्दै सुरुवाति अग्रता दिलाए।
२३ औं मिनेटमा मोराटाले गोल गरेपछि पहिलो हाफमा स्पेनले २–० को अग्रता लियो। दोस्रो हाफमा झनै आक्रमक भएको स्पेनले ५१ र ५५ औं मिनेटमा गरी सिल्भाको गोलबाट ४–० को अग्रता लियो।
निकै प्रभावकारी र बलियो देखिएको स्पेनका लागि ७३ औं मिनेटमा इनिएस्टाले गोल गर्दै ५–० को जित निश्चित गरे।
विश्वकपमा छनौट भएको कोस्टारिका भने स्पेन सामु निकै कमजोर देखियो।
