प्रधानमन्त्री कप काठमाडौं जिल्ला छनोट क्रिकेट प्रतियोगिताको सेमिफाइनल समिकरण पूरा भएको छ।
बिहीबार माथिल्लो मुलपानी मैदानमा समूह चरणका अन्तिम दुई खेल सकिएसँगै सेमिफाइनल समिकरण पूरा भएको हो।
समूह ‘सी’ को अन्तिम खेलमा क्रिकेट एक्सिलेन्स सेन्टर (सिइसी) ले वान डे क्रिकेट एकेडेमीलाई ९ विकेटले पराजित गर्दै समूह विजेता बन्यो। समूहका दुवै खेल जित्दै सिइसी विजेता बनेको हो।
यता समूह ‘डी’ को विजेता बनेर न्यू भिजन अन्तिम चारमा पुग्यो। न्यू भिजनले निर्णायक तथा समूहको अन्तिम खेलमा बिहीबार फरेवर क्रिकेट ब्वाइज क्लबलाई ५४ रनले पराजित गर्दै अन्तिम चरणमा स्थान पक्का गर्यो।
प्रतियोगिताको सेमिफाइनलमा सिइसी र न्यू भिजनसहित महावीर क्लब र ग्रेट हिमालयन अन्तिम चारमा पुगेका छन्।
अब सेमिफाइनलमा भोलि शुक्रबार समूह ‘ए’ को विजेता महावीर र समूह ‘सी’ को विजेता सिइसी भिड्नेछन्।
शनिबार हुने दोस्रो सेमिफाइनलमा समूह ‘बी’ को विजेता ग्रेट हिमालयन र समूह ‘डी’ को विजेता न्यु भिजनबीच प्रतिस्पर्धा हुनेछ।
प्रतियोगिताको फाइनल आइतबार हुनेछ। प्रतियोगिताको समूह चरणमा १४ टोलीले प्रतिस्पर्धा गरेका थिए।
