नेपाल क्रिकेट संघ (क्यान) का सचिव तथा नेपाली राष्ट्रिय क्रिकेट टोलीका पूर्वकप्तान पारस खड्काले सन् २०२४ को लिजेन्ड्स लिग क्रिकेट प्रतियोगिता खेल्ने भएको छ।
सिजनका लागि पारसलाई गुजरात जायन्टले आबद्ध गरेको हो। उनलाई बिहीबार भएको अक्सनबाट गुजरातले १२ लाख ५० हजार भारूमा टोलीमा आबद्ध गरेको हो।
प्रतियोगिता सेप्टेम्बर २० देखि भारतमा हुनेछ। प्रतियोगितामा गुजरातसहित इन्डियन क्यापिटल्स, भीलवाडा किंग्स, मनिपाल टाइगर्स, साउदर्न सुपरस्टार र अर्बानराइजर्स हैदरावाद छन्।
प्रतियोगिता खेल भारतको राजस्थानदेखि कास्मिरमा पनि हुनेछन्।
६ टोलीबीच २५ खेल हुनेछन्। लिग चरणको शीर्ष स्थानमा रहने दुई टोलीबीच अक्टोबर १६ मा फाइनल हुनेछ।
सबै टोलीमा भारतका तथा अरु देशका पूर्व क्रिकेटरको जमघट छ। नेपालका पारस खड्का आबद्ध गुजरातमा अफगानिस्तानका पूर्व कप्तान अस्घर अफगान, लिन्ड सिमोन्स, क्रिस गेल लगायत छन्।
