लुम्बिनी र कोशी प्रदेशले कैलालीको धनगढीमा जारी एनआईबीएम सुदूरपश्चिम मुख्यमन्त्री १६ बर्ष मुनिको राष्ट्रिय क्रिकेट प्रतियोगितामा जित हात पारेका छन्।
लुम्बिनी प्रदेशले सुदूरपश्चिम प्रदेशलाई १५ रनले हरायो । फाप्ला क्रिकेट मैदानमा भएको पहिलो खेलमा टस जितेर पहिले ब्याटिङ गर्दै लुम्बीनी प्रदेशले २९.४ ओभरमा सबै विकेट क्षतिमा १४० रन बनायो।
लुम्बिनीका लागि सन्तोष यादवले ४५ रन र आशिष ओलीले २२ रन बनाए। सुदुरपश्चिमका लागि आशिष शाही र अशोक धामीले दुई दुई विकेट लिए।
प्रतिउत्तरमा सुदूरपश्चिम प्रदेशले २८.४ ओभरमा सबै विकेट क्षतिमा १२५ रन मात्रै बनाउन सक्यो। सुदूरपश्चिमका लागि नरेन भट्टले ३२ रन, ऋतिक थापाले २५ रन र मेट्रिक थापाले अविजित २२ रन बनाए। लुम्बिनीका लागि आशिष ओलीले ४ विकेट लिए। सागर गैरे, कमरान अहमाद र सन्तोष यादवले एक एक विकेट लिए। खेलमा चार विकेट लिएका लुम्बिनीका आशिष ओली प्लेयर अफ द म्याच भए।
दोस्रो खेलमा कोशी प्रदेशले बागमती प्रदेशलाई १६ रनले किनारा लगायो। कोशीले टस जितेर पहिले ब्याटिङ गर्दै २८.४ ओभरमा सबै विकेट क्षतिमा १५१ रन बनायो।
कोशीका लागि दिपु भुजेलले ३७ रन, अलिश मण्डलले २६ रन र आशिक मगरले अविजित २२ रन बनाए। बागमतीका लागि सुविन हाडाले ४ विकेट लिए। त्यस्तै अर्थव पौडेल र सार्थक धितालले दुई दुई विकेट लिए ।
बागमतीले २८.२ ओभरमा सबै विकेट क्षतिमा १३५ रन मात्रै बनाउन सक्यो। बागमतीका लागि रोशन विकले २१ रन र सुयांशु कोईरालाले २० रन बनाए। कोशीका लागि कृतिक कामतले ४ विकेट लिए। प्रतिश पौडेल र आशिक मगरले दुई दुई विकेट लिए । ४ विकेट लिएका कोसीका कृतिक कामत प्लेयर अफ द म्याच भए । उनले नगद दुई हजार पाए ।
प्रतियोगिता अन्तर्गत भोली दुई खेल हुनेछन् । पहिलो खेलमा लुम्बिनी प्रदेश र कर्णाली प्रदेश तथा तथा दोस्रो खेलमा सुदुरपश्चिम प्रदेश र मधेश प्रदेश प्रतिस्पर्धा गर्नेछन्। प्रतियोगिताको विजेताले नगद दुई लाख र उपविजेताले नगद एक लाख प्राप्त गर्नेछन् । त्यस्तै म्यान अफ द सिरिजले नगद १५ हजार, उत्कृष्ट ब्याट्सम्यान र बलरले जनही नगद १० हजार तथा प्लेयर अफ द म्याचले नगद दुई हजार प्राप्त गर्नेछन् ।
नेपाल क्रिकेट संघले मलेसियामा हुने १६ वर्षमुनिको ईस्ट जोन कप क्रिकेट प्रतियोगितालाई मध्यनजर गर्दै प्रतियोगिताको आयोजना गरेको हो । एसियन क्रिकेट काउन्सिलको कार्यक्रम अनुसार सो प्रतियोगिता अगामी जेठ ३ देखि १४ गतेसम्म मलेसियामा हुनेछ ।
1682513149.JPG)
-1756794700.JPG)
-1746009348.jpg)
