एसिसी प्रिमियर कपअन्तर्गत समूह ‘बी’ को आफ्नो अन्तिम खेलमा बहराइनलाई ८ विकेटले पराजित गर्दै युएई सेमिफाइनलमा प्रवेश गरेको छ।
बुधबार मुलपानी मैदानमा जित हात पारेसँगै समूहका सबै चार खेल खेल्दा शीर्ष स्थानको युएईले ६ अंक जोड्यो।
अब पाँच अंक जोडेर दोस्रो स्थानमा रहेको हङकङ वा ४ अंक जोडेको कुवेत मध्ये एक टिम सेमिफाइनल पुग्नेछ। हङकङ र कुवेतबीच बिहीबार खेल हुँदैछ। तीन अंक जोडेको बहराइन र सबै खेलमा पराजित सिंगापुर भने बाहिरिएका छन्।
बुधबार पहिले ब्याटिङ गरेको बहराइन ४०.५ ओभरमा ११६ रनमै अलआउट भयो। बहराइनका लागि कप्तान हैदर बट र अली दाउदले सर्वाधिक २३-२३ रन जोडे।
बलिङमा युएईका आयन खानले चार विकेट लिए। रोहन मुस्ताफा र कार्तिक मेइयाप्पनले दुई दुई विकेट लिए।
११७ रनको लक्ष्य युएईले २७.४ ओभरमा २ विकेट गुमाएर पार गर्यो। वृत्य अरविन्दले नटआउट ६२ रन र मुस्ताफाले नटआउट ५० रन जोडे। त्यसअघि आर्यन लक्रा ५ रन र मोहमद वासीम १ रनमा आउट भए।
यो समूहको विजेताले नेपाल रहेको समूह ‘ए’ को उपविजेतासँग सेमिफाइनलमा भिड्नेछ। यस्तै समूह उपविजेताले समूह ‘ए’ को विजेतासँग खेल्नेछ।
नेपालले बिहीबार साउदी अरेबियालाई पराजित गरे समूह विजेता हुनेछ। यस्तै भोलिको खेलमा हङकङले जित हात पारे समूह विजेता हुनेछ। यस्तो अवस्थामा नेपाल र युएईबीच सेमिफाइनलमा भिडन्त हुने देखिन्छ। नेपाल पराजित भए र हङकङले जित हात पारेमा भने दुई टिमबीच सेमिफाइनलमा भेट हुने सम्भावना छ।
-1756794700.JPG)
-1746009348.jpg)
