नेपाल क्रिकेट संघ (क्यान) ले गत फागुन १७ गते सबै जिल्ला क्रिकेट संघलाई १६ वर्ष मुनिको जिल्ला टिम छनोटका लागि पत्र पठाएको थियो।
एसियन क्रिकेट काउन्सिल (एसिसी) ले आगामी मे १७ देखि आयोजना गर्ने यू-१६ इस्ट जोन कपका लागि टिम बनाउन जिल्लादेखि नै खेलाडी छनोट गर्ने योजनाअनुरुप क्यानले उक्त पत्र पठाएको थियो।
सो पत्रमा चैत १५ सम्म जिल्लाबाट खेलाडी छनोट गरी प्रदेश र क्यानलाई उपलब्ध गराउन भनिएको थियो। खेलाडी छनोट गर्दा उमेर प्रमाणित हुने सक्कल प्रमाणपत्र अनिवार्य रुपमा लिएर प्रतियोगिता संचालन गर्न भनिएको थियो।
सो पत्रअनुसार काठमाडौं जिल्लाले जन्मदर्ताको आधारमा खेलाडी छनोट गरेको थियो। खेलाडी छनोट गरेर काठमाडौंको टिम गत वैशाख ३ गते चितवनमा प्रदेशस्तरीय छनोट खेल्न गएको थियो।
त्यहिँ दिन क्यानले प्रादेशिक क्रिकेट संघहरुलाई मुख्यमन्त्री कप यू-१६ पुरुष राष्ट्रिय क्रिकेट प्रतियोगितामा टिम सहभागी गराउने विषयमा पत्र पठायो।
सो पत्रमा नाबालक परिचय पत्रसहित जन्ममिति खुलेको प्रमाण पत्र अनिवार्य पेश गर्नु पर्ने भनिएको थियो। जिल्लालाई पठाएको पत्रमा जन्म मिति खुल्ने प्रमाणपत्र भए पुग्ने भएकाले काठमाडौंका अधिकांस खेलाडीसँग नाबालक परिचय पत्र थिएन।
प्रदेश स्तरिय प्रतियोगिता वैशाख ४ देखि भएकाले काठमाडौं प्रतियोगितामै केन्द्रित भयो। काठमाडौंले चितवनलाई पराजित गर्दै उपाधि समेत जित्यो।
सुदूरपश्चिमको धनगढीमा जारी यू-१६ राष्ट्रिय प्रतियोगिताका लागि बागमतीको टिममा काठमाडौंका पाँच जना परे।
तर अहिले काठमाडौंबाट बागमतीको टिममा परेका दुई खेलाडीलाई भने प्रतियोगिता खेल्नबाट बञ्चित गरिएको छ। काठमाडौं जिल्लाका प्रतिनिधि दिवाकर घलेका अनुसार बागमतिको टिममा परेका विरेन्द्रसिंह साउद र बुद्धिमान विष्टलाई प्रतियोगितामा खेल्न दिइएको छैन।
‘सुरुमा क्यानकै पत्रअनुसार हामीले वडाबाट बनाइएको जन्मदर्ताको आधारमा खेलाडी छनोट गर्यौं। हामीलाई नाबालक प्रामणपत्रको विषयमा केहि भनिएको थिएन। तर वैशाख ३ मा प्रादेशिक क्रिकेट संघलाई नाबालक प्रमाणपत्र पनि चाहिने पत्र पठाएको भन्ने सुनियो। जिल्लालाई सो बिषयमा केहि थाहा थिएन। त्यहिबेला हामी चितवनमा प्रतियोगिता खेल्न जाँदै थियो। खेल नै छाड्ने अवस्था भएन,’ घलेले भने, ‘सुरु मै नाबालक परिचय पत्र चाहिने भनेको भए हामी त्यहिँअनुसार खेलाडी छनोट गर्थ्यौं। तर अहिले छनोट भइसकेर प्रदेशको टिममा परेपछि खेल्न नदिदा खेलाडीको भविष्यमाथि खेलवाड भएको छ।’
यसविषयमा मुख्यमन्त्री यू-१६ राष्ट्रिय प्रतियोगिताको आयोजक सुदूरपश्चिम प्रादेशीक क्रिकेट संघका अध्यक्ष हरि रेग्मीसँग कुरा गर्दा मागेको काजगात पेश नगरेकाले प्रतियोगितामा सहभागी नगराएको बताए।
‘आठ कक्षाको प्रमाणपत्र र जन्मदर्तालाई कपी गरेर नक्कली बनाएर ल्याउन थालियो। त्यहिँ भएर हामीले नाबालक प्रमाणपत्र भनेका हौं,’ रेग्मीले भने, ‘ती खेलाडीले अरु प्रतियोगिता खेलेको पनि हुन सक्छ। हामीसँग रेकर्ड हुन्छ। हामीले छनोटमा केही भन्न मिल्दैन। खेलाडी पठाउनु प्रदेशको गल्ती हो।’
जिल्लालाई ढिलो गरी नाबालक प्रमाणपत्र पठाएको विषय भने उनले स्विकार गरेनन्। यद्यपी उनले कोही खेलाडीमाथि शंका लागेको खण्डमा प्रमाणपत्र माग्न सक्ने बताए।
‘छनोट समितिलाई खेलिरहेको खेलाडीको विषयमा थाहा हुन्छ। राष्ट्रिय टिममा पर्ने खेलाडीको विषयमा झन् थाहा हुने नै भयो। शंका लागेको खण्डमा मागेको प्रमाणपत्र दिनु पर्ने हुन्छ,’ उनले भने।
-1756794700.JPG)
-1746009348.jpg)
