रोल्पामा सिमेन्ट बोकेकोट्रेलर दुर्घटना हुँदा एक जनाको घटनास्थलमै मृत्यु भएको छ भने अर्का एक जना घाइते भएका छन्।
दाङको घोराही उपमहानगरपालिका – ११ हापुरका २९ वर्षीय आयुस गिरीको घटनास्थलमै मृत्यु भएको जिल्लाका निमित्त प्रहरी प्रवक्ता प्रहरी निरीक्षक विजय चापागाईंले बताए। उनीट्रेलरका सहचालक रहेको चापागाईंले बताए।
टेलर चालक रोल्पाको परिवर्तन गाउँपालिका – २ का ३० वर्षीय कृष्णप्रसाद डाँगी गम्भीर घाइते भएका छन्। उनको दाहिने खुट्टा भाँचिएको र टाउको लगायत शरिरका विभिन्न भागमा चोट पटक लागेर बोल्न नसक्ने अवस्थामा फेला परेका चालक डाँगीलाई बिहान पौने ११ बजेतिर उपचारका लागि दाङको घोराहीस्थित राप्ती स्वास्थ्य विज्ञान प्रतिष्ठानमा पठाइको प्रहरी निरीक्षक चापागाईंले जानकारी दिए।
शहिद मार्ग हुँदै दाङको घोराहीबाट नुवागाँउ तर्फ जाँदै गरेको ना १ क ६९६८ नम्बरको सिमेन्ट बोकेको टेलेर रोल्पाको त्रिवेणी गाउँपालिका – २ दुई खोलीमा सोमबार बिहान ३ बजे दुर्घटनामा परेको थियो।ट्रेलर सडकदेखि १५० मिटर तल खसेको छ।
दुर्घटनाबारे बिहान ८ बजे मात्रै सूचना पाएको प्रहरीले बताएको छ। दुर्घटनाबारे खबर पाएपछि प्रहरी चौकी नुवागाँउ बाट गएको प्रहरीले सहचालकलाई मृत अवस्थामा र चालकलाई गम्भीर अवस्थामा उद्धार गरी अस्पताल पठाएको थियो।
