पूर्वराष्ट्रपति विद्यादेवी भण्डारीले काठमाडौंको थापागाउँस्थित एक निजी घर भाडामा लिएर सचिवालय सञ्चालनमा ल्याएकी छन्।
उक्त घरमा २०४८ सालमा मदन भण्डारीले चुनावी प्रचार कार्यालय राखेका थिए। त्यसबेला मदनले काठमाडौं क्षेत्र नम्बर १ र ५ बाट चुनाव जितेका थिए।
२०५० साल जेठ ३ गते मदन भण्डारीको निधन भएपछि क्षेत्र नम्बर १ को उपनिर्वाचनमा विद्या भण्डारीले पनि सोही घरमै कार्यालय राखेर चुनाव प्रचार गरेकी थिइन्।
अहिले मदन भण्डारीको ७५ औं जन्मजयन्ती मनाउन गठन गरिएको मूल व्यवस्थापन समितिको सम्पर्क कार्यालय रहने गरी उक्त घर भाडामा लिइएको एमालेमा एक नेताले बताए।
बागमती प्रदेशका पूर्वमुख्यमन्त्री डोरमणि पौडेल मूल व्यवस्थापन समिति संयोजक छन्।
भण्डारीले सक्रिय राजनीतिमा आउने भन्दै सदस्यता नवीकरण गराएकी थिइन्। तर केन्द्रीय कमिटीको नवौं बैठकले पूर्वराष्ट्रपति राजनीतिमा फर्कन नमिल्ने भन्दै उनको सदस्यता नवीकरण स्वत: निष्क्रिय पारेको थियो।
त्यसपछि भण्डारीले एमालेको पूर्वउपाध्यक्षको हैसियतमा पत्रकार सम्मेलन र विज्ञप्ति निकाल्दै आफ्नो सदस्यता कसैले पनि खोस्न नसक्ने जिकिर गरेकी थिइन्।
भण्डारीले भाडामा लिएको उक्त घर एमालेकै नेता विदुर मैनालीको हो। मैनाली २०५४ सालमा काठमाडौं महानगरपालिकाको उपमेयर निर्वाचित भएका थिए। त्यसबेला मेयर एमालेकै केशव स्थापित थिए। मैनाली अहिले पूर्वराष्ट्रपति भण्डारीनिकट छन्। स्थापित भने निष्क्रिय छन्।
यसैबीच उक्त घरमा भण्डारीले आफ्नो सचिवालयसमेत राखेको उनीनिकट स्रोतको दाबी छ। ‘यही घरमा उहाँले सचिवालय पनि राख्नु भएको छ,’ उनले भने।
भण्डारी भंगालमा बस्दै आएकी छन्।
-1746009348.jpg)
