रूसी तेल किनेको भनेर अमेरिकी राष्ट्रपति डोनाल्ड ट्रम्पले भारतमाथि दबाब दिइरहेका बेला भारतले भने रूससँग दुर्लभ खनिज पदार्थको उत्खननमा सहकार्य गर्ने प्रतिबद्धता जनाएको छ।
दुई देशको अन्तर-सरकारी आयोगको दिल्लीमा भएको बैठकमा दुर्लभ खनिज पदार्थको उत्खनन, भूमिगत कोइलालाई ग्यास बनाउने प्रविधि लगायत आधुनिक औद्योगिक पूर्वाधारको निर्माणबारे छलफल भएको छ।
तामा, लिथियम, निकल, कोबाल्ट लगायतका दुर्लभ खनिजहरू स्वच्छ ऊर्जा प्रविधि, वायु टर्बाइन, विद्युत् सञ्जाल, विद्युतीय सवारी साधन र ब्याट्री उत्पादनजस्ता आधुनिक प्रविधिका लागि आवश्यक हुन्छन्।
भारतीय वाणिज्य तथा उद्योग मन्त्रालयका अनुसार दुई पक्षबीच आल्मुनियम, मल र रेल यातायातमा सहकार्य बढाउने विषयमा पनि सहमति भएको छ। यसका साथै, खानी क्षेत्रका उपकरण र अन्वेषण, अनि औद्योगिक तथा घरेलु फोहोर व्यवस्थापनमा क्षमता अभिवृद्धि र प्रविधि हस्तान्तरण गर्ने विषयमा पनि छलफल भएको भारतीय समाचार संस्था पिटिआईले जनाएको छ।
रूसी तेल किनेको भनेर ट्रम्पले भारतबाट आयात हुने सबै सामानमा २५ प्रतिशत थप भन्सार घोषणा गरेका बेला दुई देशले यस्तो सहकार्य गर्ने प्रतिबद्धता जनाएका हुन्।
युक्रेनसँग युद्धविराम गर्न ट्रम्पले राष्ट्रपति भ्लादिमिर पुटिनलाई दिएको पछिल्लो समयसीमा शुक्रबार सकिँदै छ। पुटिनले युद्ध रोक्न चासो नदेखाएकाले रूसमाथि दबाब बढाउन ट्रम्पले रूसी तेल किन्ने देशलाई पनि थप भन्सार लगाउने भन्दै आएका छन्।
भारत र चीन रुसी तेलका मुख्य खरिदकर्ता हुन्। अमेरिकाको डरले रूसी तेल नबिके रूसको आम्दानी घटेर युद्धको खर्च धान्न गाह्रो हुन्छ। त्यसैले पुटिनलाई युद्ध रोक्न सहमति जनाउन दबाब दिन ट्रम्पले यस्तो नीति लिएका हुन्।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1746009348.jpg)
