नेकपा (एमाले) का महासचिव शंकर पोखरेलले माओवादी केन्द्रमा नेतृत्व परिवर्तन नै नभएको बताएका छन्।
सामाजिक सञ्जाल फेसबुकमा २०४६ सालको आन्दोलनपछि एमाले र नेपाली कांग्रेस पार्टीको फेरिएका नेतृत्वको सूची राख्दै माओवादी केन्द्रका पुष्पकमल दाहाल ‘प्रचण्ड’लाई कटाक्ष गरेका हुन्।
पोखरेलले २०४६ सालको परिवर्तनपछि नेकपा (माले) र नेकपा (मार्क्सवादी) एकता भएर एमाले बनेयता मदन भण्डारी, मनमोहन अधिकारी, माधवकुमार नेपाल, झलनाथ खनाल र केपी ओली पार्टी प्रमुख बनेको उल्लेख गरेका छन्।
यसमध्ये मनमोहन अधिकारी पार्टी अध्यक्ष भए पनि उनको भूमिका कार्यकारी थिएन। उनी एमालेको पाँचौं र छैठौं महाधिवेशनपछि अध्यक्ष बनेका थिए।
मदन भण्डारी २०४६ देखि २०५० सालसम्म पार्टी महासचिव थिए।
मदन भण्डारीको निधनपछि २०६४ सालको अन्तिमसम्म माधवकुमार नेपाल पार्टी महासचिव बने। २०६४ देखि २०७१ सम्म झलनाथ खनाल पार्टी प्रमुख बने भने २०७१ को नवौं महाधिवेशनयता केपी शर्मा ओली पार्टी अध्यक्ष छन्।
नेपाली कांग्रेसमा बहुदलीय व्यवस्थापछि कांग्रेसमा कृष्णप्रसाद भट्टराई, गिरिजाप्रसाद कोइराला, सुशील कोइराला र शेरबहादुर देउवा पार्टी सभापति बने। तीन जना पार्टी सभापति त दिवंगत भइसकेका छन्।
तर २०४६ को परिवर्तनअघि पार्टी नेतृत्वमा आएका प्रचण्ड अहिलेसम्म माओवादी केन्द्रको प्रमुखकै भूमिकामा छन्।
-1746009348.jpg)
