ब्राजिलको सर्वोच्च अदालतले पूर्वराष्ट्रपति जैर बोल्सोनारोलाई नजरबन्दमा राख्न आदेश दिएको छ।
कू गर्ने प्रयास गरेको आरोप लागेका बोल्सोनारोलाई सर्वोच्चले सोमबार नजरबन्दमा राख्ने आदेश दिएको अन्तर्राष्ट्रिय समाचार संस्था रोयटर्सले जनाएको छ।
सर्वोच्चले तोकेका सर्तको पालना नगरेको भन्दै न्यायाधीश एलेक्जान्द्रे डी मोरेसले घरमै नियन्त्रणमा राख्न आदेश दिएका हुन्।
यसअघि सर्वोच्चले बोल्सोनारो विदेश भाग्न सक्ने भन्दै विदेशी अधिकारीसँग सम्पर्क गर्न, सामाजिक सञ्जाल चलाउन, दूतावासलाई सम्पर्कको प्रयास गर्न पनि रोक लगाएको थियो।
अदालतले बोल्सोनारोको फोन नियन्त्रणमा लिन, वकिल बाहेकसँग भेटघाट गर्न र अदालतको अनुमति प्राप्त व्यक्तिसँग मात्रै भेट्न पाउने आदेश दिएको छ।
उक्त आदेशपछि उनलाई ब्रासिलियास्थित निवासमा प्रहरीले नियन्त्रणमा लिएको छ। उनको फोन पनि प्रहरीले नियन्त्रणमा लिएको रोयटर्सले समाचारमा उल्लेख गरेको छ।
बोल्सोनारोको कानुनी समूहले भने कुनै पनि सर्तको उल्लंघन नगरेको दाबी गरेको छ। नजरबन्दको आदेशविरूद्ध पुनरावेदन गर्ने पनि तयारी रहेको बताएको छ।
अमेरिकी स्टेट डिपार्टमेन्टले भने नजरबन्दमा राख्ने आदेशको निन्दा गरेको छ।
न्यायाधीश मोरेसले ब्राजिलका संस्थाको दुरूपयोग गरी विपक्षलाई चुप बनाउने र लोकतन्त्रलाई समेत खतरामा राखेको बताएको छ।
बोल्सोनारोसँग नजिकको सम्बन्ध रहेका अमेरिकी राष्ट्रपति डोनाल्ड ट्रम्पले यसअघि नै मुद्दा चलाए ५० प्रतिशत भन्सार दर लगाउने चेतावनी दिएको थियो।
गत महिना ट्रम्पले ब्राजिलका राष्ट्रपति लुला दा सिल्भालाई पत्र लेखेर अगस्ट १ देखि ५० प्रतिशत भन्सार लागू गर्ने बताएको थियो। उनको त्यो पत्रमा पूर्वराष्ट्रपति बोल्सोनारोमाथि गरिएको व्यवहार अन्तर्राष्ट्रिय अपमान भएको बताएका थिए।
बोल्सोनारो सन् २०२२को निर्वाचनमा लुलासँग पराजित भएका थिए। तर उनले पनि ट्रम्पले जस्तै राष्ट्रपतिबाट पराजित भएपछि इलेक्ट्रिक भोटिङ मेसिनमा समस्या आएकाले निर्वाचन परिणाम नै त्रुटिपूर्ण रहेको दाबी गरेका थिए।
उनले चुनावमा धाँधली नै भएको आरोप समेत लगाएका थिए।
द न्यूयोर्क टाइम्सका अनुसार ब्राजिलले चीनपछि अमेरिकासँग सबभन्दा धेरै व्यापार गर्ने गरेको छ। ट्रम्पले बोल्सोनारोमाथि लगाइएको अभियोग हटाए भन्सार पनि हटाउने बताएका थिए।
ब्राजिलको सर्वोच्च अदालतले बोल्सोनारोलाई कू गर्न खोजेको अभियोगमा दोषी ठहर गरी कैद सजाय सुनाउन सक्ने अनुमान समेत गरिएको छ।
-1746009348.jpg)
