प्रदेश नं १ को प्रतिनिधि सभा र प्रदेश सभाको मतगणना जारी, को छ अगाडि?

सुजिता कार्की

काठमाडौं, मंसिर २२ (सेतोपाटी)

प्रतिनिधि सभा र प्रदेश सभाका मंसिर १० र २१ गते भएको निर्वाचनको मतगणना जारी छ।

तर प्रदेश नं १ को भने कुनैपनि क्षेत्रको नतिजा हालसम्म सार्वजनिक भएको छैन। पहिलो चरणमा निर्वाचन भएको प्रदेश नंम्बर १ को ताप्लेजुङ, पाँचथर, संखुवासभा, भोजपुर, सोलुखुम्बु, खोटाङ र ओखलढुङ्गामा मतगणना जारी छ। तर, यहाँका प्रतिनिधि सभा र प्रदेश सभाका कुनैपनि मतपरिणाम सार्वजनिक भएको छैन।

पहिलो चरणमा निर्वाचन भएका क्षेत्रहरूको गणना जारी छ। दोश्रो चरणमा निर्वाचन भएका क्षेत्रहरूमा भने ठूलो जनसंख्या भएका कारण तत्काल मतपरिणाम आउने अवस्था छैन।

प्रदेश नंम्बर १ मा कुनैपनि क्षेत्रमा मतगणना रोकिएको भने छैन। मतगणना जारी रहेका प्रदेश सभाका १० स्थानमा एमाले अगाडि छ भने ४ स्थानमा माओवादी केन्द्र अगाडि छ।

प्रतिनिधसभातर्फ भने ताप्लेजुङमा एमालेका योगेश भट्टराई निकै अगाडि छन्। उनी कांग्रेसका केशव दाहालभन्दा ८ हजार मतले अगाडि छन्। पाँचथरमा एमालेकै बसन्तकुमार नेम्वाङ कांग्रेसका भिष्मराज आङ्दाम्बे भन्दा ४ हजार मतले अगाडि छन्।

संखुवासभामा पनि एमालेका राजेन्द्रप्रसाद गौतम अगाडि छन्। तर त्यहाँ कांग्रेसका दिपक खड्का गौतमसँग प्रतिष्पर्धामा छन्। त्यहाँ गौतम मात्र ३ सय मतले अगाडि छन्।

भोजपुरमा नेकपा माओवादी केन्द्रका सुदन किराँती अगाडि छन्। त्यहाँ कांग्रेसका उमेशजंग रायमाझी ५ हजार मतले पछाडि छन्। सोलुखुम्बुमा पनि माओवादी केन्द्रको हेमकुमार राई बलबहादुर केसी भन्दा ४ हजार मतले अगाडि छन्।

ओखलढुङ्गामा एमालेका यज्ञराज सुनुवार अगाडि छन्। त्यहाँ कांग्रेसका रामहरी खतिवडाले उनलाई पछ्याइरहेका छन्। सुनुवार १५ सय मतले अगाडि छन्। झापा, सुनसरीमा मतगणना जारी छ।

झापा ३ मा कृष्ण सिटौला राप्रपाका राजेन्द्र लिङ्देनभन्दा पछाडि छन्। त्यस्तै, झापा ५ मा मतगणना जारी छ। त्यहाँ केपी ओली अगाडि छन्। सुनसरी-३ मा विजय गच्छदार अगाडि छन्। त्यहाँ वाम गठबन्धनका तर्फबाट एमालेकी भगवती चौधरी उम्मेद्वार छिन्। मोरङ ४ मा कांग्रेसका महेश आचार्य भन्दा नेकपा माओवादीका अमनलाल मोदी २ हजार मतले अगाडि छन्।

त्यस्तै, मोरङ ६ मा कांग्रेसका शेखर कोइराला भन्दा नेकपा एमालेका लालबाबु पण्डित अगाडि छन्। लालबाबुले १३ हजार ७९ मत प्राप्त गर्दा शेखरले ११ हजार १६ मत ल्याएका छन्।

प्रकाशित मिति: शुक्रबार, मंसिर २२, २०७४ ०९:०९

सिफारिस