गत साता मात्र आफ्नो घरमा जुम्ल्या बच्चा भित्र्याएका विश्व चर्चित स्ट्राइकर क्रिस्टियानो रोनाल्डो फेरि अर्को बच्चाको बुवा बन्न लागेको खबर आफैमा अनौठौ लाग्न सक्छ। तर, बेलायतको चर्चित ‘डेली मेल’ पत्रिकाले यसको रोचक खुलासा गरेको छ।
रियल म्याड्रिडका पोर्चुगिज स्ट्राइकर क्रिस्टियानो रोनाल्डो चौथो बच्चाको बुवा बन्दैछन्। उनको प्रेमिका जर्जिना रोड्रिगेज पाँच महिनाको गर्भवती भएको डेली मेलले जनाएको छ।
२३ वर्षीय मोडलसँग गत वर्षदेखि सम्बन्ध बनाएका रोनाल्डो विहिबार राती स्पेनको इबिजामा देखिएका थिए। जहाँ रोनाल्डोले हात समातेर जर्जियालाई गाडीबाट उतारेका थिए।
जर्जियाको कोख अस्वभाविक ठूलो देखिएपछि स्पेनलगायत बेलायती पत्रिकाले रोनाल्डोको विषयमा समाचार सार्वजनिक गरेका हुन्।
रोनाल्डोले यसअघि नै अपरिचित आमाबाट पहिलो बच्चालाई जन्म दिएका थिए। जुन अहिले ७ वर्ष पुगिसकेका छन्। यस्तै, गत साता उनले सरोगेसीमार्फत जुम्ल्या बच्चा माटियो र इभालाई जन्म दिएका थिए।
विहिबार जर्जिया चिपिक्क परेको नेभी जम्पसुट लुगामा देखा परेकी थिइन्। अर्को बेलायती अखबार ‘दि सन’ ले धेरै पहिले जर्जियाबाट रोनाल्डोले आउँदो अक्टुवरमा एक बालिकालाई जन्म दिन लागेको खबर सार्वजनिक गरेको थियो।
पोर्चुगलको स्थानीय एक पत्रिकाले रोनाल्डोको पारिवारिक श्रोतलाई उदृत गर्दै लेखेको थियो, ‘छोरीको आगमनको खबरले दुवै निकै खुसी छन्। रोनाल्डोको परिवारले जर्जिनालाई माया गर्छन र यो सम्बन्धलाई लिएर खुसी छन्।’
जर्जिना धेरै पल्ट रोनाल्डोसँग देखा परिसकेकी छिन्। उनी फुटबल मैदान मात्र होइन, पार्टी तथा अन्य कार्यक्रममा पनि संगै देखा पर्दै आइरहेका छन्। केही महिनाअघि ज्युरिचमा आयोजना भएको फिफा फुटबल अवार्डमा जर्जिना रोनाल्डोसँगै देखा परेकी थिइन्।
