एसियन कप विजेता अस्ट्रेलिया कन्फिडरेशन कपअन्तर्गत विहिबार राती अफ्रिकी कप अफ नेशन विजेता क्यामरुनसँग भिडियो रेफ्रिका कारण हार टार्न सफल भएको छ।
पहिलो हाफमा क्यामरुनबाट गोल खाएको अस्ट्रेलियाले दोस्रो हाफमा गोल फर्काएको थियो। तर, त्यो गोल भिडियो सहायक रेफ्रिको सहयोगले पेनाल्टी प्राप्त गरेपछि अस्ट्रेलिया खेललाई बराबरीमा राख्न सफल भयो।
पहिलो हाफको अतिरिक्त समयमा क्यामरुनका आन्द्रे फ्राङ्क जाम्बो अंगुइसाले गोल गर्दै ४६ मिनेटमा अग्रता दिलाएका थिए। दोस्रो हाफको ५९ मिनेटमा मार्क मिलिगनले पेनाल्टीमार्फत गोल गर्दै खेललाई बराबरीमा राखे। मिडफिल्डर एलेक्स गार्सबाचलाई डिबक्स भित्र क्यामरुनका डिफेन्डर इर्नेस्ट माबोउकाले लडाएपछि रेफ्रिले पेनाल्टीको निर्णय लिन भिडियो सहायक रेफ्रि (भार) को सहयोग लिएका थिए। समूह बीमा अस्ट्रेलिया १ अंकका साथ तेस्रो स्थानमा छ भने समान अंक बटुलेको क्यामरुन चौथोमा छ।
