क्रिस्टियानो रोनाल्डोको निर्णायक गोलको सहयोगले आयोजक रुसलाई १–० ले पराजित गर्दै पोर्चुगलले कन्फिडरेशन कपमा पहिलो विजय सम्भव पारेको छ। समूह ‘ए’ मा रहेको युरो कप च्याम्पियन पोर्चुगलले मेक्सिकोविरुद्ध पहिलो खेल २–२ को बराबरीमा खेलेको थियो।
रुसी गोलकिपर इगोर अकिनफिभको सयौं खेलमा बुधबार राती रोनाल्डोले खेल सुरु भएको ८ मिनेटमा राफायल गुइरेइरोको क्रसमा हेडिङ गोल गरे। जुन खेलको निर्णायक गोल बन्यो।
जितपछि पोर्चुगल समूहमा मेक्सिको पछि दोस्रो स्थानमा छ। तर, दुवै टोलीले समान ४ अंक जोडेका छन्। मेक्सिकोले पनि अर्को खेलमा न्युजिल्यान्डलाई २–१ ले पराजित गरेको थियो।
