पेट्रोलियम पदार्थ उत्खननअन्तर्गत तेस्रो चरणमा गरिने ड्रिलिङ अध्ययनका लागि चिनियाँ टोली यहीँ महिना दैलेख आउने भएको छ।
कोरोना महामारीका कारण केही समय पछि परेको पेट्रोलियम पदार्थ उत्खनन तथा अन्वेषणको कामले तीव्रता पाउने भएको हो।
२०७६ असोजदेखि सुरु गरिएको पेट्रोलियम पदार्थ अन्वेषण तथा उत्खनन अन्तर्गतको पहिलो चरणको काम सकिएकाे छ। तेस्रो चरणमा गरिने ड्रिलिङको पूर्वतयारीका लागि चिनियाँ टोली नेपाल आउन लागेको खानी तथा भूगर्भ विभागका भूगर्भविद् डा. गणेशनाथ त्रिपाठीले जानकारी दिए।
‘चीनको टोली चैत १९ सम्म आउने भनेको छ। केही समय ढिलो चाँडो भएपनि यहीँ महिनाभित्रै आइपुग्छ’, उनले भने।
चीनको टोली सम्बन्धित स्थलमा गएर ड्रिलिङका लागि भौगोलिक अवस्था, सडकको पहुँचलगायतमा अध्ययन गरेपछि विज्ञ टोली आएर चार किलोमिटर जमिनमुनी ड्रिलिङको काम गर्ने खानी तथा भूगर्भ विभागले जनाएको छ।
टोलीले दुईदेखि तीन महिनासम्म ड्रिलिङको काम सकेपछि त्यहाँको अवस्थाबारे नेपाल सरकारलाई प्रतिवेदन बुझाउने छ।
सरकारसँग भएको सम्झौताअनुसार पहिलो चरणको काम दसैअघि सकिएको र बाँकी काम पछि सुरु गरिने तयारी थियो। तर चीनबाट आएको प्राविधिक टोली फर्के लगत्तै कोरोना महामारी आएपछि उत्खननको काम रोकिएको थियो।
टाेलीले पहिलो चरणअन्तर्गतको सेस्मिक, जियोलोजिकल, म्याग्नेटो टेल्युरिक, जिओ केमिकल स्याम्पलिङ गरी चार वटा सर्भेका काम तोकिएकै समयमा सम्पन्न गरेको डा. त्रिपाठीले बताए।
प्रधानमन्त्री केपी शर्मा ओलीको चीन भ्रमणका बेला उक्त पेट्रोलियम पदार्थ अन्वेषण तथा उत्खनन गर्ने चीन सरकारसँग सहमति भएको थियो।
सहमतिअनुसार नेपाल सरकार खानी तथा भूगर्भ विभागका महानिर्देशक सोमनाथ सापकोटा र चीन सरकारको जिओलोजिकल सर्भे कम्पनीबीच दुई अर्ब ४० करोड आर्थिक तथा प्राविधिक सहयोगमा उत्खनन गर्ने सम्झौता भएको थियो।
रासस
-1746009348.jpg)
