प्रधानमन्त्री केपी शर्मा ओलीले काठमाडौं–तराई/मधेस द्रुततमार्ग सडक आयोजनाको खोकना इलाकाको निर्माणमा देखा परेका समस्या समाधानका लागि आइतबार सम्बन्धित मन्त्रीसहित उच्चाधिकारीसँग ब्रिफिङ लिएका छन्।
उक्त आयोजनाको हालको प्रवेश विन्दुु ललितपुर महानगरपालिका–२१ को खोकनाको फुडोलमा कायम भएको छ। त्यहाँ प्रवेश विन्दु बनाउँदा खोकनाको सांस्कृति पहिचान मेटिने संस्कृतिविद् तथा स्थानीयहरूले बताउँदै आएका छन्। स्थानीयहरूको निरन्तरको विरोधका कारण आयोजनाको काम नै प्रभावित हुने भएकाले समाधानका लागि प्रधानमन्त्रीले चासो देखाएको उनको सचिवालयले जानकारी दिएको छ।
खोकना क्षेत्र नेवार समुुदायको धार्मिक तथा सांस्कृतिक सम्पदा रहेकोले त्यसलाई सम्बोधनका लागि विभिन्न विकल्पमाथि छलफल भएको सचिवालयले बताएको छ। छलफलपछि प्रधानमन्त्री ओलीले विवाद र समस्यालाई लामो समय अन्योलमा नराखी स्थानीयबासीको माग सक्दो सम्बोधन गरेर आयोजनालाई तीव्रताका साथ अघि बढाउन निर्देशन दिएका छन्।
छलफलमा भौतिक यातायात तथा पूर्वाधार मन्त्री देवेन्द्र दाहाल, रक्षामन्त्री मानवीर राई, प्रधानमन्त्रीका मुख्य सल्लाहकार विष्णुप्रसाद रिमाल, आर्थिक विकास सल्लाहकार डा युवराज खतिवडा, प्रधानसेनापति अशोकराज सिग्देल, दुवै मन्त्रालयका सचिवहरूको उपस्थिति थियो।
-1746009348.jpg)
