नेपाली कांग्रेस, एमाले, माओवादी लगायत विभिन्न राजनीतिक दलका १६ जना नेताले जेन–जी पुस्ताको भावनाअनुरूप संविधानसम्मत् ढंगले अन्तरिम सरकार गठन गर्न आह्वान गरेका छन्।
उनीहरूले बिहीबार साँझ संयुक्त विज्ञप्ति जारी गर्दै यस्तो आह्वान गरेका हुन्।
जनताको निराशा बुझेर समाधानको पहलकदमीमा कमी भएको र पार्टीमा लोकतान्त्रिक मूल्य स्थापित गर्न नसक्नुमा आफूहरूको पनि कमजोरी रहेको उनीहरूले बताएका छन्। यसका लागि आत्मसमीक्षा गर्दै क्षमायाचना पनि गरेका छन्।
संयुक्त विज्ञप्ति जारी गर्नेमा धनश्याम भुसाल, सुरेन्द्र पाण्डे, मिनेन्द्र रिजाल, देवेन्द्र पौडेल, गोकर्ण विष्ट, रामकुमारी झाक्री, अमनलाल मोदी, चन्द्र भण्डारी, जनार्दन शर्मा, एनपी साउद, राजकिशोर यादव, अमरेश सिंह, सुदन किराती, मिना तामाङ, सन्तोष परियार र प्रकाश ज्वाला छन्।
उनीहरूले आन्दोलन क्रममा भएको जनधन क्षति, सार्वजनिक तथा निजी सम्पत्ति क्षति, व्यक्ति केन्द्रित हमला लगायतको छानबिन गरी दोषी यकिन गर्न र कानुनी दायरामा ल्याउन एक शक्तिशाली आयोग गठनको पनि माग गरेका छन्।
त्यस्तै, राज्यको उच्च तहमा बसेका सबैको सम्पत्ति छानबिन गरी कारबाहीको दायरामा ल्याउन उच्चस्तरीय आयोग गठनको माग पनि उनीहरूले गरेका छन्।
'वर्तमान संविधान संशोधन र परिमार्जनबारे विभिन्न मत रहेको सन्दर्भमा ध्यान दिँदै संविधानमा गर्नुपर्ने सुधारलाई सरोकारवाला सबैसँग परामर्श गरी सिफारिस गर्न संविधान पुनरवलोकन तथा सुधार आयोग गठन गरियोस्,' विज्ञप्तिमा भनिएको छ।
उनीहरू अगाडि लेख्छन्, 'आन्दोलनले उठाएका मुख्य नाराहरू सान्दर्भिक भएको निष्कर्ष निकाल्दै देशमा विद्यमान विषम परिस्थिति समाधान गर्न, शान्ति सुरक्षा कायम गर्न र समाधानका लागि सहयोगी बन्न हामी प्रतिबद्ध छौं।'
-1757416219.jpg)
-1746009348.jpg)
