प्रधानमन्त्री केपी शर्मा ओलीले 'श्रम संसार' पोर्टल उद्घाटन गरेका छन्।
१३६ औं अन्तर्राष्ट्रिय श्रमिक दिवसको अवसरमा बिहीबार भर्चुअल माध्यमबाट प्रधानमन्त्री ओलीले उक्त पोर्टल उद्घाटन गरेका हुन्।
यो पोर्टलले सरकार, निजी क्षेत्र र जनतालाई जोड्ने पुलको काम गर्ने प्रधानमन्त्री ओलीले बताए।
'यसले रोजगारीमा आबद्धता हुन सहजीकरण गर्नेछ। रोजगारदाताहरूको नियमन र नागरिकहरूमा श्रमको सम्मान गर्ने बानीको विकास हुनेछ रोजगारदातालाई योग्य जनशक्तिको उपलब्धता सुनिश्चित हुनेछ,' उनले भने।
साथै,श्रमिक, रोजगारदाता र रोजगार सेवा बीचको दुरी हटाई नागरिकको सीप क्षमता तथा योग्यताको विकास मार्फत श्रम समाजको सम्पूर्ण वर्ग र समाजलाई नियमन गर्दै राष्ट्रलाई सम्बृद्धितर्फ लैजाने प्रधानमन्त्री ओलीले बताए।
उनका अनुसार यो प्लेटफर्ममा सफलताको कथाहरू पनि उपलब्धता हुनेछन् जसले राष्ट्र निर्माणमा सहयोगी भूमिका निर्वाह गर्नेछ।
यसमा रोजगारी र उद्यमशीलताका विषयबस्तु पनि उपलब्ध हुनेछन्। आवेदन यहिँबाट दिन मिल्ने छ। यो पोर्टल प्रयोग गरेवापत कुनै शुल्क नलाग्ने श्रम, रोजगार तथा सामाजिक सुरक्षा मन्त्रालयले जनाएको छ।
यसलाई निकट भविष्यमा नागरिक एपमा आवद्ध गरी सम्पूर्ण जनतासँगको पहुँच अभिवृद्धि गर्न समेत प्रधानमन्त्रीले निर्देशन दिए।
'जब सीपमूलक जनशक्ति रोजगारीमा जोडिन्छ समृद्ध नेपाल त्यतिवेला सम्भव हुन्छ। सुखी नेपाली त्यतिबेला सम्भव हुन्छ जतिवेला श्रमिकको कल्याण महिलाको आत्मनिर्भरता र त्यसले निरन्तरता प्राप्त गर्दछ,' उनले भने।
सरकारले आन्तरिक रोजगार प्रवर्द्धन दशक घोषणा गरिसकेको र यसका लागि रणनितीक कार्ययोजना तयार गरिरहेको प्रधानमन्त्री ओलीले बताए।
