नौ दिनपछि नेप्से परिसूचकले २८ सय विन्दु पार गरेको छ। भदौ १ गते २८०३ विन्दु पुगेर घटेको नेप्सेले त्यसपछि बुधबार मात्रै यो विन्दु पार गरेको हो।
बुधबार नेप्से परिसूचक उच्च अंकले बढेर २८१९.१० विन्दुमा पुगेको छ। अघिल्लो दिनको भन्दा नेप्से ५३.०१ अंकले बढेको हो।
कारोबार रकम ८३ प्रतिशतले बढेको छ। मंगलबार चार अर्ब १८ करोड रूपैयाँको कारोबार भएको बजारमा बुधबार सात अर्ब ६८ करोड रूपैयाँको कारोबार भएको हो।
कारोबारमा आएका सबै समूहगत परिसूचक बढेका छन्। विकास बैंक समूहको परिसूचक सबैभन्दा धेरै तीन प्रतिशतले बढेको छ। सात समूहगत परिसूचकमा दुई प्रतिशतभन्दा धेरैले वृद्धि भएको छ।
यसदिन नेपाल पुनर्बीमा कम्पनीको सेयर मूल्यले ऐतिहासिक उचाई छोएको छ। कम्पनीको सेयर मूल्य एक हजार सात सय ३३ रूपैयाँमा कारोबार भएको छ।
यो कम्पनी यसदिन सबैभन्दा धेरै सेयर कारोबार हुने दोस्रो कम्पनीमा दरिएको छ। कम्पनीको ५० करोड रूपैयाँको सेयर किनबेच भएको छ।
हिमालयन रि इन्सुरेन्सको सेयर कारोबार सबैभन्दा धेरै भएको छ। यसदिन कम्पनीको ६५ करोड रूपैयाँको सेयर कारोबार भयो। यी दुवै बीमा कम्पनीले नियामकले तोकेको २० अर्ब चुक्ता पुँजी पुर्याउन बाँकी रहेकोले पनि सेयरमा आकर्षण कायमै छ।
ग्रिन भेन्चर्स पनि कारोबार सबैभन्दा धेरै हुने तेस्रो स्थानमा रह्यो। ग्रीन भेन्चर्स लिमिटेडले कालीगण्डकी गर्ज हाइड्रोपावर प्रालिको ५१ प्रतिशत संस्थापक सेयर किन्ने सम्झौता गरेपछि कारोबार थप बढ्दै गएको हो।
केही समयअघि सूचीकरण भएको विकास हाइड्रोको सेयर मूल्य सबैभन्दा धेरै बढेर यसदिन पनि सर्किट ब्रेक लागेको छ।
कम्पनीको सेयर मूल्य १० प्रतिशतले बढेर पाँच सय १७ रूपैयाँ पुगेको छ। २०८६ मा परिपक्व हुने कुमारी बैंकको ऋणपत्रको मूल्य प्रतिइकाइ ६८ रूपैयाँले घटेर एक हजार एक सय ६ रूपैयाँमा सीमित भएको छ।
बुधबार तीन सय २१ वटा लगानी उपकरणको कारोबार भएकोमा दुई सय ७३ को मूल्य बढ्यो, ४० वटाको मूल्य घट्यो। बाँकीको स्थिर रह्यो।
-1746009348.jpg)
