'संघाई अटो शो २०२५' सवारी साधन प्रेमीहरूको आकर्षणको केन्द्र रह्यो।
विश्वभरका प्रमुख अटो ब्रान्डहरूको सहभागिता, तीव्र प्रविधि विकासको झल्को दिने नवीन मोडेलहरू, र विद्युतीय तथा हाइब्रिड सवारीहरूको बाक्लो उपस्थिति यस पटकको अटो सोको मुख्य विशेषता रह्यो।
अप्रिल २३ गतेबाट सुरू भएको अटो शो मे २ सम्म चल्नेछ। करिब ३६ हेक्टर क्षेत्रफलमा फैलिएको संघाई अटो शोमा विद्युतीय, पेट्रोलियम र हाइब्रिड सवारीसाधनहरूका साथै पाटपुर्जा र ब्याट्री प्रविधिको व्यापक प्रदर्शन गरिएको छ।
नाच्ने, उफ्रने कारहरूका साथै आकर्षक तथा साना सहरी बस, पाँच मिनेटमा चार्ज हुने ब्याट्री, एकपटक चार्ज भएपछि ५०० किलोमिटर भन्दा धेरै कुद्ने गाडी अटो शोमा राखिएको छ।
'नयाँ टेक्नोलोजी र फ्युचरिष्ट गाडीहरू अटो शोमा देखिन्छन् भन्ने थियो। यस्ता थुप्रै गाडीहरू देखिए एक हिसाबले संघाई अटो शो अपेक्षित नै रह्यो,’ अटो सोमा पुगेका जिओ अटोमोबाइल कम्पनीका प्रबन्ध निर्देशक आकाश गोल्छाले भने। जिओले नेपालमा फोर्ड, कायी लगायतका गाडीहरू बिक्री गर्छ।
अटो शो अवलोकन गर्नको लागि नेपालबाट लक्ष्मी इ मोविलिटीका निराकार श्रेष्ठ, दिपक थपलिया लगायतका प्रतिनिधि पुगेका थिए। लक्ष्मी इ मोविलिटीले हुन्डा, कायी लगायतका गाडीहरू नेपालमा बेच्ने गर्छ।
त्यस्तै निशान, ओमोडा, एमजी, लिप मोटरका प्रतिनिधिहरू पनि संघाई अटो शोको अवलोकन गर्न पुगेका थिए। विश्व बजारमा आएका गाडीहरूका विषयमा जानकारी लिनु र त्यसलाई नेपाली बजारमा भित्र्याउन यस्ता एक्स्पो फलदायी हुने उनीहरूको प्रतिक्रिया छ।
यस पटकको एक्स्पोमा प्रदर्शित अधिकांश मोडेल विद्युतीय (इभी) थिए। दिपल, हुवावेइको स्टेलाटो, जिकर ७-एक्स जस्ता ब्रान्डहरूले विद्युतीय मोडेललाई प्राथमिकता दिएका छन्। बिवाइडी, निओ, एक्सपेंगजस्ता चिनियाँ कम्पनीहरूले २०२५ भित्र आफ्नो ७० प्रतिशतभन्दा बढी बिक्री इभीको गर्ने लक्ष्य सार्वजनिक गरेका छन्।
अघिल्ला अन्तर्राष्ट्रिय एक्सपोहरूमा पेट्रोलियम सवारीहरूको प्रतिनिधित्व बढी हुने गरेकोमा यो पटक विद्युतीयको छायामा परे।
यस पटकको अटो शोमा गाडीको साथमा: कृत्रिम बुद्धिमत्ता, स्वचालित प्रणाली, स्मार्ट डिस्प्ले, क्लाउड सेवा, चालकविहीन प्रविधिहरू देखाइयो।
हुवावेइले सवारीमा मोबाइल जस्तै अनुभव दिन ‘हार्मोनी ओएस’ सहितको ककपिट प्रदर्शन गर्यो।
धेरै कम्पनीहरू अब वातावरणमैत्री कार बनाउनेतर्फ लागेका छन्, जसले कार्बन धुवाँ कम उत्सर्जन गर्छ र ब्याट्री पनि फेरि प्रयोग गर्न मिल्ने हुन्छ।
चिनियाँ कम्पनी बिवाइडीले आफ्नो याङवाङ यू-९ गाडी प्रदर्शन गरेको छ। चार वटा स्वतन्त्र मोटरहरूको प्रयोग गरेर सडकमै नाच्ने, उफ्रिने र घुम्ने क्षमता यो गाडीमा छ। एक हजारभन्दा बढी हर्सपावर (अति शक्तिशाली इन्जिन) को बलमा, मात्र २.३ सेकेन्डमा नै ० देखि १०० किलोमिटर प्रति घन्टाको गतिसम्म पुग्छ। यसको अर्थ विमान टेकअप जस्तो गति सडकमा लिन्छ। बिवाईडीले हाइब्रिड एसयुभी, हाइपर इलेक्ट्रिक कार, हार्ड-कोर अफ-रोड इलेक्ट्रिक एसयुभीलाई अहिले प्राथमिकता दिएको छ।
एमजी कम्पनीले आफ्नो साइबरस्टर इलेक्ट्रिक स्पोर्ट्स कार प्रदर्शन गरेको छ। यसले इमोजी जस्तै अभिव्यक्ति देखाएर मानिसहरूलाई आकर्षित गरेको छ। यसलाई रिमोट कन्ट्रोलबाट पनि चलाउन सकिने बताइएको छ।
साओमी कम्पनीले एसयु-७ गाडीको प्रदर्शन गरेको छ। जसले टेस्लाको मोडेल-३ लाई प्रत्यक्ष चुनौती दिएको बताइन्छ। यसमा फोनजस्तै रिमोट अपडेट हुने सुविधा छ र 'हाइपरओएस' सिस्टमले यसलाई स्मार्ट फोनजस्तो बनाएको छ।
जिकरले अटो संघाई २०२५ मा अत्याधुनिक विलासी एमपिभी जिकर ९ सार्वजनिक गरेको छ। जसले एकपटकको चार्जमा ५८३ किलोमिटर रेन्ज दिने बताइएको छ। जिकर ९ ले धेरैको ध्यान खिचिरहेको बेला, कम्पनीले नेपाली बजारका लागि पनि नयाँ प्रिमियम एसयूभी सेभेन एक्स ल्याउने तयारी गरेको छ।
स्टेलेन्टिस समूह अन्तर्गतको लिपमोटरले अटो संघाई २०२५ मा आफ्नो नयाँ एसयूभी बिटेन सार्वजनिक गरेको छ। जुन हाल नेपालमा उपलब्ध सीटेनभन्दा अलिक सानो छ। यो गाडी आगामी साउन महिनामा हुने नेपाल मोबिलिटी शोमा सार्वजनिक गर्ने तयारी छ।
एनआईओले इटी ९ (लक्जरी इलेक्ट्रिक सेडान), इएल ८ इलेक्ट्रिक एसयुभी, ब्याट्री स्व्याप प्रविधि राख्यो। जिली कम्पनीले प्रिमियम इलेक्ट्रिक (बहुउद्देश्यीय गाडी), ग्यालेक्सी इ ८ को स्मार्ट इलेक्ट्रिक सेडान गाडी प्रर्दशनी गरेको छ।
एक्सपेंग कम्पनीले एक्स ९ इलेक्ट्रिक ७-सीटर, जी-६ टेस्ला मोडेलको प्रतिस्पर्धी गाडी प्रस्तुत गर्यो।
चेरी ग्रुपमा चेरी इक्युट ७ (बजेट-फ्रेन्ड्ली इलेक्ट्रिक एसयुभी), टियागो ९ (दुई इन्जिन भएको लक्जरी एसयुभी गाडी प्रस्तुत गरेको छ।
चिनिया ब्रान्डहरूमा विद्युतीय प्रभूत्व, एआई-चालित प्रणाली रहेका छन्। संघाई अटो शो २०२५ मा अन्तर्राष्ट्रिय ब्रान्डहरूको पनि पर्दशन गरिएको छ।
बिएमडब्ल्यूको आइएक्स ५ हाइड्रोजन इलेक्ट्रिक र नयाँ बिएमडब्लु ५ सिरिज प्रस्तुत गरिएको छ। मर्सिडिज-बेन्जका इक्युइ एसयुभी र इक्युएस सेडानको अपडेट भर्जन रहेका छन्।
फोर्डका मस्टाङ म्याक-ई जिटी, ई-ट्रान्जिट कस्टम र इलेक्ट्रिक भ्यान छन्।
फोल्क्सवागन आइडी ७ , इलेक्ट्रिक सेडान र टिगुवान हाइब्रिड गाडी रहेका छन्। हुन्डाइले आइओनिक ७, (फुल-इलेक्ट्रिक एसयुभी र एनभिजन ७४ (हाइड्रोजन-इलेक्ट्रिक हाइब्रिड) गाडी रहेका थिए।
त्यस्तै टोयोटा, निसान, अडी, बेन्टले लगायतका गाडीहरू रहेका थिए।
अटो शो सँगै डिलर मिट
चिनियाँ अटो मोबाइल कम्पनीले यो समयमा विश्वभरका बिक्री प्रतिनिधिहरूको भेला राखेर भावी रणनीतिबारे जानकारी गराएका थिए। त्यस्तै मिडियाकर्मी, बिक्रेता तथा सरोराकावालाहरूलाई आफ्नो फ्याक्ट्री अवलोकन तथा नयाँ गाडीहरूको टेष्ट ड्राइभ पनि गराइएको थियो।
कायीले इक्युट ४, थ्री एक्स प्रो, एक ७ हाइब्रिड र एस ७ फोरविल गाडीको टेष्ट ड्राइभ गराएको छ।
कायीले मिडिया प्रतिनिधि र बिक्री प्रतिनिधाहरूले फ्याक्ट्री अवलोकन गराएपछि नयाँ डिजाइनका गाडीहरूका विषयमा सुझाव मागेको थियो। फ्याक्ट्री भ्रमणमा क्रममा गाडी निर्माणको चक्र देखाउनका साथै आफ्नो क्षमता प्रस्तुत गरिएको थियो।
कायी चिनिया अटोमोटिभ कम्पनी चेरी होल्डिङको सहयोगमा स्थपना भएको कम्पनी हो। यो कम्पनीले पछिल्लो वर्ष मात्रै ६० हजार गाडी उत्पादन गरेको जनाएको छ। यसले वार्षिक एक लाख ५० हजार वटा गाडी उत्पादनको क्षमता राख्छ।
-1746068898.jpg)
