ग्लोबल नेपाली
महेश श्रेष्ठ शेष घले नेतृत्वको उच्च स्तरीय समितिले गरेको एकता महाधिवेशनबाट एनआरएनए अध्यक्ष चुनिएका छन्। यही वैशाख २० र २१ गतेको महाधिवेशनबाट उनी निर्वाचित भएका हुन्।
अहिले एनआरएनए जटिल अवस्थामा छ। शेष घले नेतृत्वको उच्चस्तरीय समिति र ११ औं महाधिवेशनबाट बद्री केसीको नेतृत्वमा बनेको कार्यसमितिबीच लामो समयदेखि विवाद छ।
यो जटिल अवस्थामा श्रेष्ठले कसरी अगाडि बढ्ने सोचेका छन्?
श्रेष्ठले एनआरएनएमा बृहत्तर एकताको विकल्प नरहेको बताए।
'सर्वोच्च अदालतको परमादेश अनुसार भएको महाधिवेशनबाट बनेको कमिटीले कानुनी भन्दा पनि भावनात्मक एकताका लागि प्रयास गर्छु,' उनले भने, 'प्रक्रियागत रूपमा अगाडि बढेकाले आधिकारिकताको विषयमा कुनै दुविधा छैन। तर कसले आधिकारिकता पाउने भन्दा पनि यसलाई भावनात्मक रूपमा कसरी एक बनाउने भन्ने हो।'
आफ्नो कार्यसमितिको पहिलो बैठकले एकताका लागि आह्वान गरेको उनले बताए। त्यस्तै नकारात्मक र उच्छृंखल कुरा नगर्ने अनि एकता भाँड्ने खालको अभिव्यक्ति नदिने भनेर निर्णय गरेको बताए।
नेपालमा केही भएन, खत्तम भयो भन्दै विदेश पलायन हुने क्रम बढेकोमा उनले चिन्ता पनि व्यक्त गरे। यसलाई चिर्न सकारात्मक सन्देश दिन जरूरी भएको उनको भनाइ छ।
'नेपाल बन्छ र बनाउन सकिन्छ, गैरआवासीय नेपाली संघले यसमा सहकार्य गर्छ भन्ने हाम्रो सोच हो। तर यसका लागि एकताबद्ध एनआरएनए चाहिन्छ,' उनले भने, 'कमिटीभन्दा बाहिर रहेका साथीहरूसँग हामी छलफल गर्छौं। त्यसका लागि मैले पहलकदमी लिन्छु। हामी दुई टुक्रा भयौं भने विश्वभरका शाखाहरू दुई टुक्रा हुन्छन्।'
आफूले पूर्वअध्यक्षहरूसँग भेट्दा समेत बृहत् एकताका लागि पहल गर्ने सुझाव पाएको उनले बताए।
बद्री केसी नेतृत्वको कार्य समितिसँग आफू निरन्तर संवादमा रहेको पनि उनले बताए।
'हामी लचक हुन तयार छौं। बद्रीजीहरू पनि लचक हुनुपर्छ भन्ने हो। हामी फुटेर बद्रीजीहरूले एउटा काम, हामीले अर्को काम गरेर हुँदैन,' उनले भने, 'पहिला हामी केन्द्रमा मिलेर सन्देश दिनुपर्छ। त्यसका लागि बद्रीजीहरूको टिम र हाम्रो टिम बसेर कुरा गर्न जरूरी छ।'
वार्ताको टेबलमा बसेर धेरै कुरा मिलाउन सकिने भन्दै श्रेष्ठले केही एजेन्डाहरूमा असहमति रहे पनि अर्को कमिटीका पदाधिकारीहरूसँग हार्दिकताको सम्बन्ध रहेको बताए। त्यसैले निरन्तर वार्ता र छलफल गर्न कुनै समस्या नभएको उनले बताए।
राजनीति र समाजसेवामा लामो विगत भएका श्रेष्ठ पञ्चायत विरूद्धको आन्दोलनका बेला पश्चिमाञ्चल इञ्जिनियरिङ कलेजमा नेपाल विद्यार्थी संघको इकाई उपसभापति थिए। २०४७ देखि २०४९ सालसम्म सोही कलेजमा उनी नेविसंघको इकाई सभापति भएका थिए।
सन् १९९४ उनी जापान गए। त्यसअघि श्रेष्ठ तत्कालीन काठमाडौं नगरपालिकामा कार्यरत थिए। सिभिल इञ्जिनियरको जागिर छाडेर उनी पढ्नका लागि जापान गएका थिए।
जापानमा केही समय पढेपछि उनको ध्यान व्यवसायमा गयो। उनी इञ्जिनियरिङ पढाइमा लागेनन्। अनि जापान गएको ६ वर्षपछि रेस्टुरेन्ट सुरू गरे। एउटा, अर्को गर्दै उनले आठ वटा रेस्टुरेन्ट खोले। यी सबै रेस्टुरेन्ट अहिले पनि सञ्चालनमा छन्।
उनले सन् २००७ मा सिटी एक्सप्रेस मनी ट्रान्सफर सुरू गरे। वैधानिक रूपमा विदेशबाट पैसा पठाउने माध्यम सिटी एक्सप्रेसले नै श्रेष्ठको पहिचानमा उचाइ थप्यो।
यसरी व्यवसायमा छिरेका श्रेष्ठले रेस्टुरेन्ट र सिटी एक्सप्रेससँगै ट्राभल एजेन्सी र कृषिमा समेत लगानी गरेका छन्।
'मेरो सबभन्दा ठूलो कृषि फर्म न्युजिल्यान्डमा छ। झन्डै ५० हेक्टर जमिनमा गोल्ड किवी खेती गरेको छु। यो असाध्यै महँगो फल समेत हो,' श्रेष्ठले भने।
उनले जापानमा पनि २० हेक्टरमा गोल्ड किवी खेती गरेका छन्। व्यावसायिक कृषि खेतीका लागि न्युजिल्यान्डबाट धेरै सिक्न सकिने उनले बताए।
हाल नेपालमा उनले सिटी एक्सप्रेस बाहेक सूचना–प्रविधि कम्पनी, बैंक, फाइनान्स, जलविद्युत, पर्यटन लगायतमा लगानी गरेका छन्। पर्वतमा रहेको 'द क्लीफ' मा उनी सुरूदेखि जोडिएका हुन्। पोखरा र काठमाडौंमा पनि पर्यटन क्षेत्रमा थप लगानी गर्ने उनको तयारी छ।
नेपालबाट मानवशास्त्रमा स्नातकोत्तर सकेका श्रेष्ठले जापानमै विद्यावारिधि पनि गरिरहेका छन्।
