प्रधानमन्त्री सुशीला कार्कीसँगको संवादमा नेपाली कांग्रेसका महामन्त्री गगन थापाले फागुन २१ को निर्वाचनमा भाग लिन आफूहरू पूर्ण प्रतिबद्ध रहेको बताएका छन्। सँगसँगै, यो सरकारले चुनावको वातावरण बनाउन नसकेको पनि उनले बताए।
बालुवाटारमा भर्खरै सम्पन्न सरकारसँगको संवादमा कांग्रेसले राखेको धारणाबारे जानकारी दिँदै महामन्त्री थापाले भने, 'हामी राजनीतिक रूपले के कुरामा प्रस्ट छौं भने संसद विघटन संविधानसम्मत होइन। यसको संवैधानिक परीक्षण सम्बन्धित निकायले गर्ला। तर राष्ट्रपतिले विशिष्ट अवस्थामा निर्वाचन घोषणा गरेर गइसकेपछि निर्वाचनबाटै संसद लिएर आउनुपर्छ भन्ने हाम्रो दलको धारणा छ। हामी निर्वाचनमा जान पूर्ण प्रतिबद्ध छौं।'
बैठकमा कांग्रेस तर्फबाट महामन्त्री थापा र प्रवक्ता प्रकाशशरण महत सहभागी थिए।
थापाले अगाडि भने, 'निर्वाचनको वातावरण बनाउने काम सरकारको हो। यसमा हाम्रो पनि सहयोग रहन्छ। तर सरकारले निर्वाचनको वातावरण बनाउन जुन प्रकारले काम गर्नुपर्थ्यो, त्यो गर्न सकेको छैन।'
सरकारले निर्वाचनको वातावरण बनायो भन्ने अनुभूति त्यसमा भाग लिने राजनीतिक दलहरूलाई हुनुपर्नेमा अहिले त्यस्तो अनुभूति हुन नसकेको महामन्त्री थापाले बताए।
भदौ २३ र २४ गते भएका घटनामा कसैलाई पनि छुट दिँदैन, चाहे त्यो राजनीतिक दलका मानिस हुन् वा आन्दोलनकारी हुन् भन्ने प्रत्याभूति यो सरकारले गराउनुपर्नेमा महामन्त्री थापाले जोड दिए।
'कानुन उल्लंघन गर्नेहरू जो भए पनि, चाहे दलका मान्छे हुन् वा दल खोल्न खोजेका मान्छे हुन्। उनीहरू कसैलाई पनि कानुनले छुट दिँदैन भन्ने भाष्य स्थापति गर्न सरकार सफल भयो भने चुनावको वातवारण बन्दै जान्छ,' उनले भने, 'सरकारले सबैलाई समान व्यवहार गर्नुपर्छ भन्ने प्रत्याभूति दिनुपर्छ।'
राजनीतिक दलहरूले पनि कहीँ कतै उत्तेजना फैलाउने काम गर्न नहुने उल्लेख गर्दै थापाले भने, 'नेपाली कांग्रेस यसमा सहयोग गर्न तयार छ।'
-1715866338.jpg)
-1746009348.jpg)
